काठमाडौं । स्वास्थ्य बिमा बोर्डका अध्यक्षले बुझाएको राजीनामापत्र स्वास्थ्य तथा जनसंख्यामन्त्री प्रदीप पौडेलले नबुझेपछि मन्त्रिपरिषद् बैठकमा लैजाने तयारी गरिएको छ । भदौ २८ गते बोर्ड अध्यक्ष डा. गुणराज लोहनीले राजीनामापत्र स्वास्थ्यमन्त्री प्रदीप पौडेलको सचिवालयमा बुझाएका थिए ।

उक्त दिन बोर्डकै कार्यक्रममा मन्त्रालयबाहिर रहेका मन्त्री पौडेलले फर्किएपछि पनि राजीनामापत्र नबुझेको मन्त्रालयले जनाएको छ ।

“सम्बन्धित व्यक्तिले मन्त्रीज्यूलाई बुझाउनुभएको होइन । सचिवालयमा छोडेर जानुभएको हो । उहाँँलाई नदिएको भएर मन्त्रीज्यूले पत्र बुझ्नु भएन,” मन्त्रालयका प्रवक्ता डा. प्रकाश बुढाथोकीले बाह्रखरीसित भने ।

तर, मन्त्रालयले राजीनामापत्र मन्त्रिपरिषद्मा लैजाने प्रक्रिया भने अघि बढाएको प्रवक्ता बुढाथोकीले जानकारी दिए । उनका अनुसार राजीनामापत्र बुझाएयता डा. लोहनी मन्त्रालय गएका छैनन् ।

आफ्नो फेसबुकमा ‘जिम्मेवारीबाट भाग्नु सामाजिक बेइमानी हो । तर अहिलेको लागि...’ भन्दै राजीनामा दिएका अध्यक्ष लोहनीले यसको कारणबारे केही बोलेका छैनन् ।

२०८० मंसिर १४ मा बोर्ड अध्यक्ष नियुक्त भएका डा. लोहनीको कार्यकाल अझै तीन वर्ष २ महिना बाँकी छ ।