काठमाडौं । एभरेष्ट महिला भलिबल लिग (ईडब्लूभीएल)को टोली ललितपुर क्विन्सले असोज ५ गते ट्यालेन्ट हन्ट गर्ने भएको छ । जावलाखेलस्थित जावलाखेल भलिबल तालिम केन्द्रमा अपराह्न १२ बजेदेखि ट्यालेन्ट हन्ट सुरु हुनेछ । 

क्लबका मुख्य प्रशिक्षक उत्सव खड्कालगायत व्यवस्थापकीय टोलीले उक्त कार्यक्रमबाट एकजना उत्कृष्ट खेलाडी छनोट गर्नेछ । छनोट हुने खेलाडीले आगामी असोज १४ गते देखि १९ गतेसम्म काठमाडौंस्थित दशरथ रंगशालाको कभर्डहलमा हुने पहिलो संस्करणको एभरेष्ट महिला भलिबल लिगमा ललितपुर क्विन्सको प्रतिनिधित्व गर्ने अवसर प्राप्त गर्नेछ । 

कुनै पनि राष्ट्रिय तथा अन्तर्राष्ट्रिय प्रतियोगितामा सहभागिता नजनाएको खेलाडी मात्रै ट्यालेन्ट हन्टमा सहभागी हुनु योग्य हुनेछ ।

ईडब्लूभीएलको नियमावली अनुसार सहभागी टोलीमा १२ खेलाडी समावेश हुनेछन् । जसमध्ये ८ जना आयोजकले ड्राफ्टमार्फत हरेक टोलीलाई उपलब्ध गराएको छ । तीन विदेशी र एक ट्यालेन्ट हन्टमार्फत छनोट गर्नु पर्नेछ ।