काठमाडौं । बंगलादेशको असहज परिस्थितिका कारण नेपाल फर्किएका एमबीबीएस तथा बीडीएस अध्ययनरत विद्यार्थीहरूले नेपालमै इन्टर्नसिप गर्न पाउनुपर्ने माग पटकपटक राख्दै आएका छन् । नेपालमै इन्टर्नसिप गरेर नेपाल मेडिकल काउन्सिलमा दर्ता हुन पाउनुपर्ने माग उनीहरूको जोड छ ।

शिक्षा विज्ञान तथा प्रविधि मन्त्रालयले भने बंगलादेशमा अध्ययनरत कलेजले तोकेकै मेडिकल कलेजमा इन्टर्नसिप पूरा गर्नुपर्ने प्रस्ट पारिसकेको छ । 

शिक्षाले परराष्ट्र मन्त्रालयमार्फत बंगलादेशको सम्बन्धित निकायमा समन्वय गरेपछि त्यहीँ इन्टर्नसिप गर्नुपर्ने व्यवस्था रहेको जनाएको छ । मन्त्रालयले भदौ २६ गते सूचना जारी गर्दै यसबारे विद्यार्थीलाई जानकारी गराएको छ ।

बंगलादेशको कानुनी व्यवस्थाबारे जानकारी माग गरी नेपालबाट गरिएको पत्राचारमा बंगलादेशको परराष्ट्र मन्त्रालयले दिएको जवाफसमेत शिक्षाले सार्वजनिक गरेको छ ।

तर, नेप्लिज मेडिकल स्टुडेन्ट्स एसोसिएसन बंगलादेशले शिक्षा मन्त्रालयको जवाफले अन्योल थपेको भन्दै असन्तुष्टि जनाएको छ । एसोसिएसनले मन्त्रालयको अध्ययन समितिले समेत काम नगरेको आरोप लगाएको छ ।

नेपालमै इन्टर्नसिप र नेपालमै दर्ता हुने गरी बंगलादेशका सम्बन्धित निकायहरूको धारणा माग गर्न र यसको कानुनी प्रावधानबारे अध्ययन गर्न बनेको समितिले विद्यार्थी छल्ने काममात्रै गरेको एसोसिएसनको आरोप छ ।

भदौ २८ गते जारी एसोसिएसनको विज्ञप्तिमा भनिएको छ, "बंगलादेशको सुरक्षा संवेदनशीलताको कारण नेपालमै इन्टर्नसिप गराउन माग गरिएकामा सोभन्दा पृथक खालका जानकारी माग गरी प्रक्रियामा झन अन्योल थपेको छ ।"

नेपालमै इन्टर्नसिप गर्ने वातावरण मिलाउन विद्यार्थीको माग छ । माग सम्बोधन नभए आन्दोलनमा उत्रिने उनीहरूले  चेतावनी दिएका छन् ।

नेपालमा इन्टर्नसिप गराउन सम्भव छ ?

नेपाल मेडिकल काउन्सिल अहिले शिक्षा मन्त्रालयकै निर्णयमा चलिरहेको छ । काउन्सिलका राजिस्ट्रार डा. सतिशकुमार देव नेपालमा इन्टर्नसिप गराउनै नमिल्ने प्रावधान नरहेको बताउँछन् ।

“विदेशमा पढेका विद्यार्थीलाई त्यहाँ विशेष परिस्थिति सिर्जना भएमा नेपालमै इन्टर्नसिप गराई दर्ता गर्न चाहिँ मिल्छ । हाम्रो कानुनले यो कुरामा रोक्दैन । तर, विशेष परिस्थिति रहेको पुष्टि चाहिँ हुनुपर्छ,” डा. देवले बाह्रखरीसित भने ।

उनका अनुसार, बंगलादेशबाट अध्ययन गरेर आएका विद्यार्थीको हकमा उनीहरू अध्ययन गरिरहेका कलेजले नै विशेष परिस्थितिका कारण नेपालमा इन्टर्नसिप गराउन अनुमति दिनुपर्ने हुन्छ ।

कोभिडकालमा यही विशेष परिस्थितिको प्रावधानमा रहेर दुईवटा ब्याचका विद्यार्थीलाई नेपालमै इन्टर्नसिप गर्ने व्यवस्था मिलाइएको थियो ।

बंगलादेशमा उनीहरू फर्किनै नसक्ने अवस्था छैन

बंगलादेशमा भड्किएको हिंसाका कारण त्यहाँ अध्ययन गरिरहेका झन्डै १५ सय नेपाली विद्यार्थी नेपाल फर्किएका थिए । तीमध्ये अधिकांश विद्यार्थी पुन: फिर्ता गइसकेका छन् ।

बाँकी रहेका विद्यार्थी पनि फर्किएर आफ्नै कलेजमा इन्टर्नसिप पूरा गर्न सक्ने अवस्था रहेको ढाकास्थित नेपाली दूतावासका एक अधिकारीले बताए ।

“नेपाली विद्यार्थीलाई फर्किनै नसक्ने अवस्था छैन । कोभिडकालजस्तो होइन,” दूतावासका एक अधिकारीले बाह्रखरीसित भने ।

तर, इन्टर्नसिप गराउने/नगराउने सन्दर्भमा नेपाल सरकारकै निर्णय अन्तिम हुने उनको धारणा छ ।