काठमाडौं । सत्तारूढ दलका शीर्ष नेताहरूबीच सरकारको कामलाई प्रभावकारी बनाउने निर्णय भएको छ । प्रधानमन्त्री निवास, बालुवाटारमा आज बसेको बैठकले सो निर्णय गरेको हो ।

सरकार र संसद्को कामलाई प्रभावकारी, सन्तुलित, व्यवस्थित ढंगबाट सञ्चालन गर्ने भन्ने विषयमा छलफल भएको नेकपा एमालेका मुख्य सचेतक महेश बर्तौलाले जानकारी दिए ।

नेपाली कांग्रेस र एमालेबीच भएको सातबुँदे समझादारीमा उल्लेख भएका कार्यलाई कार्यन्वयन गर्न समेत छलफल भएको बर्तौलाले बताए ।  

संविधान संशोधनसँग जोडिएर बाहिर भएका प्रचारका बारेमा जनतालाई जानकारी गराउने, यसका बारेमा व्यवस्थित गृहकार्य बनाएर अघि बढ्ने उनले बताए ।

उनले सरकारका समग्र काम प्रक्रियाहरूमा सिंगो सत्तापक्ष कसरी एकीकृत धारणाका साथ अघि बढ्ने भन्नेबारेमा पनि छलफल भएको बताए ।  न्यूनतम साझा कार्यक्रमको प्रक्रिया अघि बढाउन शीर्ष नेताहरूबाट निर्णय भइसकेकाले सरकार निर्माणताका भएको सातबुँदे सम्झौताअनुसार नै सरकारको न्यूनतम साझा कार्यक्रम बन्ने उल्लेख गरे ।

"आजको छलफल र बैठकको उद्देश्य भनेको सरकार र संसद्को कामलाई कसरी प्रभावकारी ढंगबाट अघि बढाउने, सरकार संसद्को कामलाई कसरी सन्तुलित ढंगबाट, व्यवस्थित ढंगबाट अघि बढाउने र सँगै सरकारलाई समग्र काम प्रक्रियामा सिंगो सत्तापक्ष कसरी एकीकृत धारणाका साथ अघि बढ्ने ? यिनै विषयमा छलफल केन्द्रित थियो । यो सरकार निर्माणका केही समझदारीहरू पनि थिए । विशेष गरी नेपाली कांग्रेस र नेकपा एमालेको बीचमा सातबुँदे समझदारी भएको थियो । त्यो समझदारीको जगबाट हामीले सरकार सञ्चालन गर्ने प्रतिबद्धता गरेका थियौँ । न्यूनतम साझा कार्यक्रमको प्रक्रिया अघि बढाउन निर्णय भइसकेको छ," उनले भने ।