काठमाडौं । नेकपा (एकीकृत समाजवादी)का अध्यक्ष माधवकुमार नेपालले पार्टीको पदाधिकारी निर्वाचनमा आफू कसैका पक्षमा नलागेको बताएका छन् । केही दिनअघि भएको पार्टीको पदाधिकारी निर्वाचनमा कोही व्यक्तिविशेषलाई जिताउन वा हराउन आफूले चिट नबाँडेको उनले स्पष्ट पारेका हुन् ।

उनले आफू पार्टी अध्यक्षका रूपमा सबैको साझा व्यक्ति भएको बताए । निर्वाचनमा कुनै हस्तक्षेप नगरेको उनले जिकिर गरे ।

निर्वाचनमा १० प्रकारका चिट बाँडिएको भने उनले स्वीकार गरे । चिटमा नाम परेकाले हारेको र नपरेका विजयी भएको निर्वाचन परिणाम आएकाले त्यसले काम नगरेको उनले बताए ।

सहमति जुटाउन नसकेपछि पदाधिकारीको व्यवस्था नै हटाउने प्रस्ताव आफूले राखेको भए पनि त्यो सम्भव नभएको उनले सुनाए । सबैले माग गरेपछि निर्वाचन गर्न बाध्य भएको उनले बताए ।

अध्यक्ष नेपालले उमेदवारले नै आफूलाई तटस्थ बस्न आग्रह गरेको उल्लेख गरे । सोहीअनुरूप आफू तटस्थ बसेको उनको भनाइ छ ।

सार्वजनिक रूपमा पार्टीविरुद्ध बोल्ने नेतालाई छुट दिन नसकिने उनले बताए । पार्टीमा असन्तुष्ट नेताहरूलाई फकाइरहेको उनले सुनाए ।

न्युज एजेन्सी नेपालसित माधव नेपालले व्यक्त गरेको भनाइ पढ्नोस्–
त्यस्तो कसैले पनि आरोप लगाएका छैनन् । किनकि, थाहा छ कि अध्यक्ष सबैप्रति साझा हुनुहुन्छ । चिटको काममा मैले रोक नै लगाएको हो । मलाई थाहा पनि भएन । थाहा भएको होइन । कसैले अध्यक्षलाई दोष लगाउलान्, कसैले महासचिवलाई दोष लगाउलान् । कसैले अर्को नेतालाई दोष लगाउलान् । आ–आफू जित्न आ–आफ्नो ढंगले चलेका होलान् । म यस्ता कुराको विपक्षमा छु । मेरो लागि सबै बराबर हुन् । साझा हुन् । प्रतिस्पर्धामा गइसकेपछि प्रतिस्पर्धाबाट जित्ने हो । मन जित्न सक्नुपर्‍यो । मन जित्न नसक्ने हो भने त दोष लगाएर हुँदैन । भोटिङबाट टुंगो लगाएको त हो नि ! के मान्छेले भोटिङ लोभलालचले गरेको हो त ? डरत्रासले गरेको हो त ? डरत्रासले होइन होला । भोटिङको सबै पक्ष हेर्नुहुन्छ भने चिटमा नाम भएका मान्छे हारेका छन् । नाम नै नभएका मान्छे जितेका छन् । चिटले त जिताएको रहेनछ । चिटमा नाम भएका मान्छे हारेका छन् फेरि । कसरी हार्‍यो त ? चिटमा नाम नै नभएकाले कसरी जिते त ? चिट एउटा छैन फेरि, १० प्रकृतिका चिट बाँडेको छ फेरि । त्यो सबै चिट मैले पाइसकेको पनि छैन । मैले मागिरहेको छु । कुनकुन चिटमा क–कसको नाम छ, हेर्छु । त्यो नाम भएका मान्छेले बाँडेका हुन् कि ! शंका गर्नुपर्ने भएन ? नाम भएकाहरूले मात्रै होला नि बाँडेका त ! कतिपय जित्नुपर्ने साथीहरू नजित्दाखेरि उहाँहरूलाई पनि दुःख लागेको होला । अब म नजित्नुपर्नेहरूले जिते भन्न पनि सक्दिनँ । जितेर आउनुभएको मान्छेचाहिँ ठिक भएन, नजितेकाहरूले जित्नुपर्थ्यो भनेर मैले भन्नु पनि भएन । अनुभवी साथीहरू जसले जित्न सक्नु भएन – उहाँहरूप्रति पनि मेरो सहानुभूति छ । जितेर आउनुहुनेहरूलाई अगाडि बढ्न शुभकामना छ । केन्द्रीय कमिटीका सदस्यले भोट दिए, उहाँहरूको मन जित्न सक्नु भएन । दोष अरूलाई दिएर हुन्छ ? मैले भनेको पनि थिएँ– पदाधिकारीमा हामीले सहमति गर्न सक्ने भएनौँ । पदाधिकारीको व्यवस्था नै हटाइदिऊँ भनेकै हो । हुँदैन हुँदैन भने । चुनाव चुनाव भने । अनि के गरौँ त ! म कसको पक्षमा लागूँ त ! तपाईं चुपचाप बसिदिनुस् भनेको हुन् मलाई । म केही बोलिनँ । किनकि, मलाई थाहा छ, पर्खालको पनि कान हुन्छ । एउटालाई खुसुक्क भन्यो भने मलाई त भन्नुभएको छ भन्दै हिँड्छ । त्यसो हुनाले म यस्ता कुरामा किन लाग्न चाहिनँ भने जब म दुईजना मान्छेलाई कन्भिन्स गर्न सकिरहेको छैन एउटै पदका आकांक्षी दुईजना, अनि म कतिलाई कन्भिन्स गर्न सक्छु त ? म थाँके । दुइटै भन्छन्– तपाईं चुप लागिदिनुस्, हामीलाई छोडिदिनुस् ।