काठमाडौं । नेपाल प्रिमियर लिग (एनपीएल)मा पोखराको टिम सबैभन्दा धेरै मूल्यमा बिक्री भएको छ । नेपाल क्रिकेट संघ (क्यान)को आयोजनामा हुने प्रतियोगिताका लागि पोखराको स्वामित्व तीन करोड ५७ लाखमा नेपाल टी–२० प्रालिले प्राप्त गरेको हो ।

यसैगरी, काठमाडौंको स्वामित्व कान्तिपुर पब्लिकेसनले तीन करोड ३३ लाख ३३ हजार ३३९ रुपैयाँमा प्राप्त गर्‍यो ।

जनकपुर ड्रिम्स स्पोर्टस र लुम्बिनी फर्च्युना हेल्थ केयरको स्वामित्वमा पुग्यो । उनीहरूले क्रमशः दुई करोड पाँच लाख रुपैयाँ र एक करोड ८६ लाखको बोली लगाएका थिए ।

चितवनको स्वामित्व चितवन मेडिकल कलेजले एक करोड ७६ लाख एक हजारमा प्राप्त गर्दा सुदूरपश्चिमको फ्रेन्चाइज गर्न इम्पायर स्पोर्टस प्रालिले एक करोड ६८ लाख ८८ हजार ८८८ रुपैयाँको बोली लगायो ।

विराटनगर एक करोड ५१ लाख रुपैयाँमा एमएडी ड्रिम्स प्रालिको स्वामित्वमा पुग्यो ।

हिमालयन बिल्डर्सले एक करोड ११ लाख ७० हजार रुपैयाँमा कर्णालीको स्वामित्व खरिद गर्‍यो ।

आगामी मंसिर १५ देखि पुस ६ सम्म हुने प्रतियोगिताका लागि क्यानले बिहीबार फ्रेन्चाइज टिम खरिद गर्न बोली लगाएको थियो । टिम खरिदका लागि न्यूनतम मूल्य एक करोड तोकिएको थियो । जसमा १३ कम्पनीले भाग लिएका थिए ।