काठमाडौं । मलेसियाका लागि प्रस्तावित नेपाली राजदूत नेत्रप्रसाद तिम्सिनाले आफू संसदीय सुनुवाइबाट अनुमोदित भएमा नेपाल, मलेसिया र दक्षिणपूर्वी एसियाका सहप्रमाणीकृत देशहरूबीचको द्विपक्षीय सम्बन्धलाई सुदृढ बनाउने काम गर्ने बताएका छन् । 

संसदीय सुनुवाइको सोमबारको बैठकमा कार्ययोजना प्रस्तुत गर्दै उनले बदलिँदो अन्तर्राष्ट्रिय परिवेशमा असंलग्न आन्दोलनको महत्त्व र सान्दर्भिकतालाई थप उजागर गर्ने जनाएका हुन् । दुई देशबीचको सम्बन्ध विस्तार र सुदृढ गर्न तथा कूटनीतिका नयाँ क्षेत्रहरू विस्तार गर्न राजनीतिक, आर्थिक, सामाजिक, सांस्कृतिक विषयहरूको गहन अध्ययन गर्ने र परराष्ट्र मन्त्रालयमा आवधिक प्रतिवेदन पेस गर्ने, विभिन्न देशका कूटनीतिक नियोगका प्रमुखहरूसँग भेटघाट र सम्बन्ध विकास गर्ने कार्ययोजनामा उल्लेख छ । 

“दुई देशबीच भएका श्रम सम्झौता तथा समझदारीहरूको कार्यान्वयन गर्न पहल गर्ने र प्रक्रियामा रहेका श्रम सम्झौताहरूलाई अन्तिम रूप दिन काम गर्ने,” कार्ययोजनामा भनिएको छ । 

दक्ष जनशक्तिका लागि वैदेशिक रोजगारीका नयाँ अवसरहरूको खोजी गर्ने र आम नेपाली श्रमिकका लागि सुरक्षित र प्रतिष्ठित कम्पनीहरूमा नयाँ रोजगारीका अवसरको खोजी गर्ने उनको भनाइ छ । नेपाली श्रमिकले भोगिरहेका समस्या समाधान गर्न पहल गर्ने कार्ययोजनमा भनिएको छ ।