काठमाडौं । प्रमुख प्रतिपक्ष दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीका करण लोकतन्त्र नै जोखिममा पर्ने खतरा बढेको भन्दै चिन्ता व्यक्त गरेका छन् ।

मंगलबार प्रतिनिधिसभा बैठकमा विशेष समय लिएर उनले स्वार्थ समूहका निम्ति काम गर्ने प्रधानमन्त्रीको शैलीले नागरिकमा वितृष्णा बढेको जिकिर गरे । “सरकार स्वार्थ समूहका लागि काम गरेर यति छिट्टै खुइलियो । यसमा प्रतिपक्षका रूपमा खुसी नहुनुपर्ने कुरा होइन,” प्रचण्डले भने, “तर, म बडो चिन्ताका साथ रोस्ट्रममा उभिएको छु ।”

उनले सरकार स्वार्थ समूहका निम्ति खुलेर उभिँदा लोकतन्त्रको स्थायित्वमाथि जोखिम बढेको बताए । सरकार खुइलिँदा प्रतिपक्ष खुुसी हुनुपर्ने भए पनि लोकतन्त्रको स्थायित्वमाथिको जोखिमले आफूलाई चिन्ता लागेको उनले उल्लेख गरे ।

उनले सरकार फेरिँदा आफूले ‘स्वार्थ समूहका कारण’ भनेको सुनाए । हाल सरकारले नै त्यसलाई पुष्टि गरिदिएको उनको भनाइ थियो ।