काठमाडौं । देशका केही ठूलासाना नदीमा आज पनि पानीको बहाव उल्लेख्य बढ्ने सम्भावना छ । नदीतटीय क्षेत्रमा उच्च सतर्कता अपनाउन बाढी पूर्वानुमान महाशाखाले आग्रह गरेको छ ।

यस दिन बागलुङ, प्युठान, रोल्पा, रुकुम पूर्व, रुकुम पश्चिम र जाजरकोट भई बहने अधिकांश साना नदीमा बहाव उल्लेख्य बढ्ने अनुमान छ । यी जिल्लाका केही नदीमा आकस्मिक बहाव हुन सक्ने महाशाखाले जनाएको छ ।

यस्तै, सिन्धुली, मकवानपुर, रामेछाप, सिन्धुपाल्चोक, पर्वत, दैलेख, सुर्खेत, कालीकोट, अछाम, बाजुरा, बझाङ र दार्चुला भई बहने केही साना नदीमा पनि बहाव बढ्ने अनुमान छ ।

अबका तीन दिन कोसी, नारायणी, महाकाली र यसका सहायक नदीहरूको जलसतह सतर्कता तहभन्दा तलै रहने अनुमान छ । कन्काई, कमला, वाग्मती, पूर्वी राप्ती, पश्चिम राप्ती र बबई नदीको जलसतह पनि सतर्कता तहभन्दा तलै रहने महाशाखाको पूर्वानुमान छ ।

कर्णालीको सहायक नदी भेरीको जलसतह हाल सतर्कता तहनजिक रहेको महाशाखाले जनाएको छ ।