काठमाडौं । बंगलादेशी साहित्यकार तसलिमा नसरीनले त्यहाँकी प्रधानमन्त्री शेख हसिनाको बहिर्गमनप्रति टिप्पणी गरेकी छन् । बंगलादेशका इस्लाम कट्टरपन्थीलाई खुसी पार्न विगतमा हसिनाले आफूलाई देश निकाला गरेको उनले उल्लेख गरेकी छन् ।

उनले सामाजिक सञ्जाल एक्समा लेखेकी छन्, “हसिनाले इस्लामिस्टलाई खुसी पार्न मलाई देश निकाला गरेकी थिइन् । मृत्युशय्यामा रहेकी आमालाई भेट्न सन् १९९९ मा बंगलादेश गएयता मलाई बंगलादेश प्रवेश गर्न दिइएन । तिनै इस्लामवादी विद्यार्थी आज आन्दोलनमा छन् र हसिनालाई देश छाड्न बाध्य बनाए ।”

बंगलादेश पनि सैन्यशासन लागु हुने गरी अर्को पाकिस्तान बन्ने हो कि भन्ने उनले चिन्ता व्यक्त गरेकी छन् । उनले लेखेकी छन्, “शेख हसिनाले राजीनामा दिएर देश छाड्न बाध्य हुनुपर्‍यो । यो अवस्थाका लागि उनी (हसिना) जिम्मेवार छिन् । उनले इस्लामवादीलाई बढ्न दिइन्, भ्रष्टाचारमा सामेल भइन् । अब बंगलादेश अर्को पाकिस्तान नबनोस्, सैन्यशासन लागु हुनु हुँदैन । राजनीतिक दलहरूले लोकतन्त्र स्थापित गर्नुपर्छ र धर्मनिरपेक्षता अपनाउनुपर्छ ।”

विद्यार्थी आन्दोलन चर्किएपछि हसिनाले प्रधानमन्त्री पदबाट राजीनामा दिएर सोमबार (हिजो) देश छाडेकी थिइन् । उनी भारत आइपुगेकी छन् ।

मुस्लिम धर्मविरोधी साहित्य लेखेको भन्दै तसलिमा नसरीनलाई सन् १९९४ मा बंगलादेशबाट निकाला गरिएको थियो ।