वासिंटन । अमेरिकाले इरानका तर्फबाट चाँडै इजरायलमाथि आक्रमण हुन सक्ने आँकलन गरेको छ ।

यसैबारेमा छलफल गर्न अमेरिकी राष्ट्रपति जो बाइडेनले मध्यपूर्वको अवस्थाका बारेमा छलफल गर्न राष्ट्रिय सुरक्षा टोलीलाई ‘सिचुएसन रुम’मा छलफलका लागि सोमबार बोलाएका छन् ।

बाइडेनले आजै जोर्डनका राजा अब्दुल्लाहसँग पनि कुरा गर्ने ह्वाइट हाउसले जनाएको छ । सो कुराकानी जोर्डनका विदेशमन्त्री आइमान सफाडीले इरान भ्रमण गरेको भोलिपल्ट हुन लागेको हो ।

अमेरिकाले अन्य साझेदारहरू फ्रान्स, बेलायत, इटाली, इजिप्टसँग पनि मध्यपूर्वमा युद्ध टार्नका लागि कुरा गरिरहेको बताइएको छ ।

यसैक्रममा अमेरिकी विदेशमन्त्री एन्टोनी ब्लेंकनले जी ७को बैठकमा आइतबार इरानले इजरायलमा आगामी २४ देखि ४८ घण्टामा आक्रमण सुरु गर्न सक्ने जनाएको एक्सियोसले स्रोतलाई उल्लेख गर्दै जनाएको छ ।

ब्लिंकेनले त्यतिबेला इरानी आक्रमण कुन समयमा हुन्छ भन्नेबारेमा भने जानकारी नभएको तर, यो सोमबार सुरु हुन सक्ने जनाएका छन् ।

जी ७ले मध्यपूर्वमा युद्ध फैलिन नदिन धैर्यताका लागि सबैलाई आग्रह गरेको छ । इरानले हालै हमासका नेता इस्माइल हानियाको तेहरानमा हत्या गरिएपछि इजरायलले कठोर सजाय पाउने चेतावनी दिएको थियो । एजेन्सी