भक्तपुर । टिपरको ठक्करबाट आज एक मोटरसाइकल चालकको मृत्यु भएको छ । ज्यान गुमाउनेमा काभ्रेपको मण्डनदेउपुर नगरपालिका–१ घर भई हाल भक्तपुर कमलविनायक बस्ने अन्दाजी २१ वर्षीय सुवाश तामाङ रहेका छन् ।

जिल्ला प्रहरी परिसर भक्तपुरका प्रहरी नायब उपरीक्षक राजन कार्कीका अनुसार काठमाडाैंबाट भक्तपुरतर्फ आउँदै गरेको ग ७ प ५३५३ नम्बरको मोटरसाइकललाई बाप ४ ख २९०१ नम्बरको टिपरले मध्यपुरथिमि–४ नयाँ थिमिमा पछाडिबाट ठक्कर दिएको हो ।

मोटरसाइकल पछाडि सवार काभ्रेपलाञ्चोक महाकाल गाउँपालिका–६ घर भई हाल कमलविनायक बस्ने २० वर्षीय सञ्जीव थापामगरको मध्यपुर अस्पतालमा उपचार भइरहेको कार्कीले बताए ।

प्रहरीले दुर्घटनामा संलग्न टिपर र चालक काभ्रेपालञ्चोक मण्डनदेउपुर–६ बस्ने २८ वर्षीय राजकुमार राईलाई नियन्त्रणमा लिएको छ । रासस