काठमाडौं । नेपाल निर्माण उद्योग परिषद्ले सहज व्यवसायको वातावरण बन्ने गरी मौद्रिक नीति ल्याइएको भन्दै स्वागत गरेको छ । शनिबार काठमाडौंमा पत्रकार सम्मेलन गर्दै परिषद्ले निर्माणका साथै समग्र वित्तीय क्षेत्र संकटमुक्त भई व्यवसाय गर्न सहज हुने गरी मौद्रिक नीति ल्याइएको भन्दै स्वागत गरेको हो ।

वर्तमान सरकारको पहलमा नेपाल राष्ट्र बैंकले समस्या समाधान हुने गरी मौद्रिक नीति सार्वजनिक गरेर आफ्ना माग सम्बोधन गरेको भन्दै परिषद्ले धन्यवाद समेत दिएको छ । चेक तथा जमानत जफत गरी कालोसूचीमा र प्रहरी धरकपड भई गुज्रिरहेको निर्माण क्षेत्रलाई मौद्रिक नीतिले उचित सम्बोधन गरेको परिषद्का अध्यक्ष खोपनिधि लोहनीले बताए । संकटग्रस्त निर्माण व्यवसाय पुनः लयमा फर्कन मौद्रिक नीति कोसेढुंगा साबित हुने उनको भनाइ थियो ।

उनले निर्माण क्षेत्रसम्बन्धी आफूहरूका केही माग यसअघि नै सरकारसमक्ष राखेको उल्लेख गरे । ती माग पनि सरकारले सम्बोधन गर्ने उनले विश्वास व्यक्त गरे । हिमालयन टेली भ्वाइस