काठमाडौं । रुसी टिमसँगको दोस्रो मैत्रीपूर्ण भलिबलका निम्ति मैदान उत्रिँदा नेपाली राष्ट्रिय महिला भलिबल टिम जितसहित सुखद अन्त्य लक्ष्यमा हुनेछन् । 

रुसी टिमसँग यसअघि पहिलो खेलमा नेपाल ३–० को सोझो सेटमा पराजित भएको थियो । उक्त खेलमा नेपालले २५–१७, २५–१९, २५–१५ को हार व्यहोरेको थियो । यी दुई टिमबीचको दोस्रो खेल आज त्रिपुरेश्वरस्थित राष्ट्रिय खेलकुद परिषद् (राखेप) परिसरमा रहेको कभर्ड हलमा हुनेछ । खेल दिउँसो ३ः३० बजेदेखि सुरु हुनेछ । 

नेपालले यसै महिनादेखि घरेलु कोर्टमै आयोजना हुने काभा नेसन्स लिगअघि तयारीस्वरूप रुसको टिमसँग दुई मैत्रीपूर्ण खेल खेल्न लागेको हो । खेल नेपालस्थित रुसी दूतावासको सहयोगमा भएको हो । साउन १७ गतेदेखि हुने उक्त प्रतियोगितामा नेपालसँगै भारत, इरान, श्रीलंका र माल्दिभ्सले सहभागिता जनाउनेछन् ।