काठमाडौं । नेपाल क्रिकेट संघ (क्यान)ले पूर्वअलराउन्डर आदिल अन्सारीले क्रिकेट खेल्न पाउनुपर्छ भन्ने पक्षमा रहेको जनाएको छ । 

दुई वर्षअघि भएको नेपाल टी–२० लिगमा स्पट फिक्सिङमा मुछिएपछि आदिल क्यानबाट निलम्बित भएका थिए । तर, गत असार २१ गते बसेको क्यानको केन्द्रीय कार्यसमिति बैठकले आदिलमाथिको निलम्बन फुकुवा प्रक्रिया अघि बढाउने निर्णय गरेको थियो । 

उक्त बैठकले निलम्बन फुकुवा सम्बन्धमा आवश्यक निर्णयअधिकार अनुशासन समितिलाई दिने र समितिले एक हप्ताभित्र निर्णय गर्नुपर्ने जनाएको थियो । क्यानका प्रवक्ता छुम्बी लामाले अनुशासन समितिबाट केही दिनमै यसबारे प्रतिवेदन आउने बताए । 

“अनुसन्धान समितिले निलम्बन कसरी फुकुवा गर्ने भन्ने सम्बन्धमा कानुनी र सम्बन्धित व्यक्तिहरूसँग समन्वय गरी प्रतिवेदन बनाएर फुकुवासम्बन्धी निर्णय गर्ने हो । हामीले एक हप्ताको म्याद भनेका थियौँ,” क्यानका प्रवक्ता छुम्बी लामाले बाह्रखरीसँग भने, “तर, यो अलि जटिल विषयवस्तु भएकाले अनुशासन समितिले अध्ययन र सम्बन्धित व्यक्तिहरूबाट प्रतिक्रिया लिने गरिरहेको छ । सम्भवतः क्यानलाई दुई–चार दिनभित्रमा अनुशासन समितिको प्रतिवेदन आउँछ होला । आदिलको निलम्बन फुकुवा गर्ने कुरामा क्यान सकारात्मक छ । उनले खेल्नुपर्छ भन्ने कुरामा दुईमत छैन ।” 

दुई वर्षअघि भएको नेपाल टी–२० लिगमा स्पट फिक्सिङको निष्कर्षसहित नेपाल प्रहरीको केन्द्रीय अनुसन्धान ब्युरो (सीआईबी)ले पूर्वक्रिकेटर मेहबुब आलमसँगै अन्सारीलाई पक्राउ गरेको थियो । तर, जिल्ला अदालत काठमाडौंले आलम र अन्सारीसँगै नितेश साह गुप्ता, नवीन कँडेल, रवी माझीलाई सफाइ दिएको थियो ।