![युवती जिस्क्याएको निहुँमा भएको थियो ‘ग्याङ फाइट’, हत्यामा कैँचीको प्रयोग !](https://12khari.top/uploads/posts/Murder-Hatya-1720521780.jpg)
विराटनगर । युवती जिस्क्याएको निहुँमा विराटनगरमा ‘ग्याङ फाइट’ भएको खुलेको छ । सोमबार राति भएको घटनामा एक जनाको हत्या भएको छ । अन्य दुईजना घाइते भएका छन् ।
जिल्ला प्रहरी कार्यालय मोरङका अनुसार विराटनगर महानगरपालिका वडा नम्बर २ स्थित नेपाल टेलिकमको कार्यालय नजिकै सोमबार राति दुई समूहबीच हानाहानको स्थिति सिर्जना भएको थियो ।
घटनास्थलमा भेटिएको मोबाइलको आधारमा झगडामा संलग्नहरूलाई पत्ता लगाइएको प्रहरीले जनाएको छ । जिल्ला प्रहरी प्रमुख एसपी नवराज कार्कीले हत्यामा कैँची प्रयोग खुलेको जानकारी दिए । प्रहरीले कैँचीलाई कोसी अस्पताल नजिकैको एक फार्मेसीबाट बरामद गरेको छ ।
प्रहरीका अनुसार कोखमा प्रहार गरिएको कैंचीको चोटका कारण मोरङको कटहरी गाउँपालिका वडा नम्बर १ जमटोकीका २१ वर्षीय करण कामतको मृत्यु भएको छ । जमटोकीकै २२ वर्षीय विक्रम मण्डल र १७ वर्षीय अमन राय घाइते छन् । उनीहरूको शरीरमा गहिरो चोट छ । उनीहरू मारपिट भएको ठाउँमा घाइते अवस्थामा फेला परेका थिए । उनीहरूलाई स्थानीयले उपचारका लागि कोसी अस्पताल लगेका थिए । त्यसपछि प्रहरीलाई खबर गरिएको थियो ।
प्रारम्भिक अनुसन्धानको आधारमा ‘ग्याङ फाइट’मा संलग्न भएको आरोपमा प्रहरीले ताप्लेजुङका १८ वर्षीय निमदावा शेर्पा, भोजपुरका २० वर्षीय सञ्जय गिरी, विराटनगर–११ का २० वर्षीय सोनु गिरी र मोरङको रंगेलीका १६ वर्षीय एक किशोरलाई पक्राउ गरेको छ ।
युवती जिस्क्याएको निहुँमा हत्या !
प्रारम्भिक अनुसन्धानबाट युवती जिस्क्याएको विषयमा दुई समूहबीच विवाद भएको खुलेको छ । घटना भएको अघिल्लो दिन युवती जिस्क्याएको विषयमा विवाद भएको खुलेको मोरङका प्रहरीका एसपी कार्कीले जानकारी दिए ।
“त्यही निहुँमा गिरीलगायतको समूहले कामत समूहलाई बाटो ढुकेर आक्रमणमा उत्रिएको खुल्न आएको देखिन्छ,” उनले भने ।
उनका अनुसार युवती पक्राउ पर्ने समूहको भएको खुलेको छ । “कटहरीको महेशपुरमा युवतीलाई एक समूहका युवाले जिस्क्याएका रहेछन् । अर्को समूहले प्रतिवाद गर्दा विवाद भएको रहेछ,” एसपी कार्कीले भने ।
मृतक र अन्य दुई घाइतेमाथि कैँचीले आक्रमण गरेको पाइएको छ ।
घटनाबारे सुक्ष्मरूपमा अनुसन्धान भइरहेको र घटनामा संलग्न अन्यको खोजीलाई तीव्र पारिएको प्रहरीले जनाएको छ । पक्राउ परेकाहरूविरुद्ध कर्तव्य ज्यान मुद्दा चलाउने तयारी गरिएको छ ।