काठमाडौं । एमाले आफ्ना नेताहरूलाई जिल्ला र निर्वाचन क्षेत्रमा केन्द्रित गराउने तयारी गरेको छ । एमालेले त्यसका लागि केन्द्रीय नेताहरूको कार्यविभाजन गर्न लागेको हो । 

पदाधिकारीसहित केन्द्रीय नेताहरूलाई तेह्र महिनाअघि जिम्मेवारी दिइएको थियो । पदाधिकारीसहित स्थायी कमिटी सदस्य, पोलिट्ब्यूरो र केन्द्रीय सदस्यहरूलाई फरक भूगोलमा खटाइएको थियो । जसअनुसार स्थायी कमिटी र पोलिट्ब्यूरो सदस्यलाई जिल्ला इन्चार्ज र केन्द्रीय सदस्यहरूलाई पालिका इन्चार्जको जिम्मा दिइएको थियो । 

अब भने फरक भूगोलको जिम्मेवारी हटाइने तयारी गरिएको छ । अब पहिले जस्तै घर–क्षेत्रकै जिम्मेवारी दिने तयारी गरेको सचिव पद्मा अर्यालले जानकारी दिइन् । आफू रहेको भन्दा फरक भूगोलको कार्यवधिको समायावधि सकिएकाले त्यसमा पुनर्विचार गर्न लागिएको उनले जानकारी दिइन् । 

उनले बाह्रखरीसँग भनिन्, “पहिले घरक्षेत्रको जिम्मेवारी थियो । अघिल्लोपटक एक वर्षका लागि फरक क्षेत्रमा खटाइएको थियो । त्यो कार्यकाल सकिएको छ । त्यसैले पार्टीले नयाँ ढंगले पुनर्विचार गर्छ । अब पहिले जस्तै घर क्षेत्रकै जिम्मेवारीमा जाला ।” 

एमालेमा फरक भूगोलमा खटाउने निर्णय नेताहरूमा असन्तुष्टि देखिएको थियो । नेता अर्को क्षेत्रमा जाँदा पार्टीको समस्या पहिचान र समाधानका लागि सजिलो हुने निष्कर्ष एमालेले निकालेको थियो । 

नेताहरूले भने फरक क्षेत्रमा खटाइँदा आगामी चुनावमा असर पर्ने भन्दै असन्तुष्टि जनाएका थिए । एमालेले आगामी ०८४ को निर्वाचन लक्षित गरेर घरक्षेत्रमै नेताहरूको कार्यविभाजन गर्न लागेको हो ।

जसअनुसार एमालेले केन्द्रीय सदस्यहरूलाई प्रतिनिधिसभा निर्वाचन क्षेत्रमा केन्द्रीत रहनेगरी जिम्मेवारी दिन लागेको हो ।  “केन्द्रीय सदस्यलाई यसअघि पालिकामा खटाइएको थियो । अब त्यसभन्दामाथिका तहमा खटाइने छ । यसपटक जिल्ला र निर्वाचन क्षेत्रलाई केन्द्रित गरी जिम्मेवारी दिन लागिएको छ,” सचिव अर्यालले भनिन् ।

एमालेले त्यसबारे छलफलका लागि मंगलबार दिउँसो सचिवालय बैठक बोलाइएको छ । पार्टी कार्यालय च्यासलमा बस्ने बैठकमा नेतृत्व व्यवस्थापनबारे छलफल हुने प्रचार विभाग प्रमुख राजेन्द्र गौतमले जानकारी दिए । 

“हाम्रो कार्यविभाजन भएको जेठ मसान्तमा एक वर्ष भयो । अब नयाँ कार्यविभाजन गर्नुपर्नेछ । भोलिको बैठकमा नेतृत्व व्यवस्थापनबारे छलफलको एजेन्डा छ,” उनले बाह्रखरीसँग भने । 

एमालेले जिल्ला इन्चार्जको जिम्मेवारी पोलिट्ब्यूरो सदस्य र निर्वाचन क्षेत्रको इन्चार्जको जिम्मा केन्द्रीय सदस्यलाई दिन लागेको हो । यसअघिको केन्द्र्रीय समितिको बैठकले यसबारे निर्णय गर्ने जिम्मेवारी सचिवालय बैठकलाई दिइएको थियो । 

“आमरुपमा केन्द्रीय कमिटीका सदस्यहरूलाई प्रतिनिधिसभाअन्तर्गतको निर्वाचन क्षेत्रका इन्चार्जको जिम्मेवारी र नियमित बस्ने पोलिट्ब्यूरो सदस्यलाई जिल्लाको इन्चार्ज बनाउने तयारी छ,” गौतमले बाह्रखरीसँग भने । 

एक पदाधिकारीले भने भोलिकै सचिवालय बैठकबाट सो निर्णयको सम्भावना कमै रहेको बताए । सरकारमा जानेहरूको टुंगो लागिसकेपछि कार्यविभाजन गर्नुपर्ने आवाज आएकाले केही पछि मात्रै त्यो निर्णय हुने उनको भनाइ छ । 

“सरकारमा कसलाई लैजाने भन्नेमा छलफल अध्यक्ष (केपी शर्मा ओली)ले गरिरहनुभएकै होला । सरकारमा जानेहरूको टुंगो लागेपछि जिम्मेवारी हेरफेर गर्नुपर्ने मत पनि छ । सम्भवतः सरकारमा जानेहरूको टुंगो लागिसिकेपछि यसबारे निर्णय होला,” ती पदाधिकारीले बाह्रखरीसँग भने । 

एमालले आगामी चुनावको तयारी गर्नेगरी जिम्मेवारी दिन लागेको नेताहरू बताउँछन् । आफ्नै क्षेत्रमा काम गर्दा चुनाव जित्न सजिलो हुने केन्द्रीय सदस्यहरूको मत छ । तर, संगठन विभाग प्रमुख काशिनाथ अधिकारी भने चुनाव नभएर संगठन सुदृढ बनाउन नयाँ जिम्मेवारी दिन लागिएको बताउँछन् । 

“आगामी चुनाव त परको कुरा भयो । चुनाव लक्षित होइन । नेताहरूको क्षमता, अनुभवका आधारमा घर पाइक मिल्ने गरी नयाँ ढंगले कार्यविभाजन हुन्छ । त्यसको गृहकार्य भइरहेको छ,” उनले भने ।
 
०८१ लाई सुदृढीकरण र शुद्धीकरणको वर्ष बनाउने तयारी भएकाले नयाँ कार्यविभाजन गरिदा त्यसलाई केन्द्रमा राखिने उनी बताउँछन् । 

पार्टी कामलाई सुदृढ गर्ने कुरामा केन्द्रित हुन्छ । ०८१ लाई सुदृढीकरण र शुद्धीकरणको वर्ष बनाउने कुरा छ । त्यो नै केन्द्रित रहेर कार्यविभाजन हुन्छ,” उनले भने ।

फरक भूगोलको जिम्मेवारीको समग्र समीक्षा भने आउन बाँकी रहेको उनले बताए । “कतिपय ठाउँमा राम्रो पनि भएको छ । कतिपय ठाउँमा असहज, पुग्न समस्या पनि छ । समग्र समीक्षा त आइसकेको छैन,” अधिकारी भन्छन् ।