काठमाडौं । दक्षिण कोरियाले राष्ट्रिय फुटबल टिमको प्रशिक्षकमा हङ म्याङ–बोलाई पुनः नियुक्त गरेको छ ।

कोरिया फुटबल एसोसियसन (केएफए)ले पाँच महिनाअघि तत्कालीन मुख्य प्रशिक्षक जर्जेन किग्समनलाई बर्खास्त गरेको थियो । त्यसयता रिक्त रहेको स्थानमा केएफएले सोमबार म्याङलाई ल्याएको हो ।

दक्षिण कोरियका पूर्वखेलाडी समेत रहेका ह्वाङले राष्ट्रिय टिमबाट १३६ क्याप जितेका छन् । सन् २००२ मा दक्षिण कोरियाले फिफा विश्वकपमा सेमिफाइनलसम्मको यात्रा तय गर्दा ह्वाङ नै टिमको कप्तान थिए । दक्षिण कोरियाली सञ्चारमाध्यमका अनुसार ह्वाङले सन् २०२७ को एसियन कपसम्मका निम्ति सम्झौता गरेका छन् ।

यसअघि ५५ वर्षीय ह्वाङले सन् २०१३–१४ मा दक्षिण कोरियाको जिम्मेवारी सम्हालेका थिए । तर, २०१४ मा भएको विश्वकपको समूह चरणबाट बाहिरिएपछि उनले जिम्मेवारी त्यागेका थिए । कोरियन लिगमा उल्सान एचडीलाई लगातार उपाधि दिलाएपछि ह्वाङ राष्ट्रिय टिमको जिम्मेवारीमा आएका हुन् ।

ह्वाङले जर्मन प्रशिक्षक किग्समनको स्थानमा जिम्मेवारी लिनेछन् । एसियन कपको सेमिफाइनलमा जोर्डनसँग पराजित भएपछि केएफएले किग्समनलाई बर्खास्त गरेको थियो ।