काठमाडौं । नेपाली कांग्रेसका राष्ट्रियसभा सदस्य जीतजंग बस्नेतले राष्ट्रिय स्वतन्त्र पार्टी (रास्वपा)का सभापति एवं उपप्रधान एवं गृहमन्त्री रवि लामिछानेलाई फाइल खोल्ने धम्की नदिन चेतावनी दिएका छन् ।

बुधबार राष्ट्रियसभा बैठकमा उनले गृहमन्त्रीलाई कांग्रेस नेताहरूको फाइल खोल्ने धम्की नभई फाइल भए खोलेर देखाउन चुनौती दिए । उनले ब्ल्याकमेलिङको राजनीति नगर्न आग्रह गरे ।

"राष्ट्रिय स्वतन्त्र पार्टीका सभापतिले भन्नुभएको छ, फाइल खोल्छौँ । खोलौँ न सबै फाइल खोलौँ । तपाईंहरूसँग प्रहरी प्रशासन छ, हामी तयार छौँ । फाइल खोल्ने धम्की नदिऔँ । ब्ल्याकमेलिङको राजनीतिक नगरौँ । कांग्रेसको सरकार आएपछि सुनका फाइल पनि खोलिन्छन्, केके खोल्ने हो खोलिन्छन्," उनले भने ।

उनले नेपाली कांग्रेस सरकारमा जान आतुर रहेकाले चाँडो निकास दिन सरकारलाई आग्रह पनि गरे । उनले प्रधानमन्त्री पुष्पकमल दाहाल 'प्रचण्ड दुवैतिरको बल आफैँ खेल्छु भन्ने सोचेपछि अहिलेको परिणाम आएको बताए ।