काठमाडौं । श्रम, रोजगार तथा सामाजिक सुरक्षा मन्त्रालयले हालै सम्पन्न गरेको ‘श्रमाधान रोजगार मेला’ले राम्रो नतिजा दिएको बताएको छ ।

श्रम मन्त्रालयले आइतबार आयोजना गरेको पत्रकार सम्मेलनमा मन्त्रालयका सहसचिव एवं प्रवक्ता गोविन्दप्रसाद रिजालले ४१ हजार ३२५ जनाले मेलाको अवलोकन गरेको जानकारी दिए ।

उनका अनुसार मेलामा सहभागीमध्ये १७ हजार ९२१ जनाले रोजगारीका लागि आवेदन दिएका छन् । तीमध्ये १४ हजार ७८८ आवेदकलाई रोजगारीको अवसर वा प्रतिबद्धता आएको छ ।

श्रममन्त्री डोलप्रसाद अर्यालले यी रोजगारीको प्रतिबद्धता गर्ने रोजगारदाताको विवरण रहेको बताउँदै यसलाई फलोअप गरिने बताए ।

सातै प्रदेशमा आयोजना गरिएको मेलामा सरकारी, गैरसरकारी र निजी क्षेत्र सहितका ३२२ वटा स्टल राखिएका थिए । मेलामा विभिन्न शीर्षकमा ३६ वटा कार्यशाला पनि सञ्चालन गरिएको थियो ।

संघीय सरकार, प्रदेश सरकार, स्थानीय तह, निजी क्षेत्र, विकास साझेदार गरी ३३५ संघ संस्थासँग सहकार्य गरिएको मेलाका संयोजकसमेत रहेका रिजालले बताए ।

उनका अनुसार मेलाको कुल बजेट ९३ लाख ६ हजार ९६३ रहेकोमा ८५ लाख ३३ हजार ८६५ रुपैयाँ खर्च भएको छ । बाँकी रकम बचत छ ।

मन्त्रालयले गत जेठ १७ गते ३० गतेसम्म सातवटै प्रदेशमा श्रमाधान रोजगार मेलाको आयोजना गरेको थियो ।

आठ उत्कृष्ट उद्यमी पुरस्कृत

श्रम मन्त्रालयले वैदेशिक रोजगारीबाट फर्केर मुलुकमा नै उद्यम गरिरहेका आठ उत्कृष्ट उद्यमीलाई पुरुस्कृत गरेको छ । आइतबार मन्त्रालयले एक कार्यक्रमको आयोजना गर्दै उत्कृष्ट उद्यमीलाई नगद र प्रमाणपत्रसहित सम्मान गरेको हो ।

वैदेशिक रोजगारीबाट फर्केका युवालाई मुलुकमा नै रोजगारीका अवसरहरू सिर्जना गर्न प्रेरित गर्न मन्त्रालयले प्रत्येक वर्ष वैदेशिक रोजगारबाट फर्केर नेपालमा उद्यम गरेका उद्यमीलाई पुरस्कृत तथा सम्मान गर्दै आएको छ ।

सम्मान तथा पुरस्कारका लागि सार्वजनिकरूपमै उद्यमीबाट आवेदनको माग गरिएको थियो । इमेलमार्फत ८९ जना उद्यमीले पुरस्कारका लागि आवेदन दिएका थिए ।

उद्यमीलाई सम्मान गर्दै श्रममन्त्री अर्यालले एकपटक वैदेशिक रोजगारीमा गएर फर्केका युवालाई मुलुकभित्रै रहने वातावरण बनाउनु अहिलेको आवश्यकता भएको बताए ।

त्यस्तै, मन्त्री अर्यालले मिटर ब्याजमा कर्जा लिएर वैदेशिक रोजगारीमा जानुपर्ने अवस्थाको अन्त्य गरिने पनि बताए ।

झापाका चन्द्रप्रसाद बस्नेतले उत्कृष्ट उद्यमी राष्ट्रिय पुरस्कार प्राप्त गरेका छन् । उनले पुरस्कारबापत एक लाख ५० हजार रुपैयाँ नगद प्राप्त गरेका छन् ।

यसैगरी, गुल्मीका रविलाल पन्थ, झापाका मोहनप्रसाद संग्रौला, जुम्लाका टक्कबहादुर नेपाली, कन्चनपुरका चन्द्रसिंह थापा, नुवाकोटका अर्जुन परियार, म्याग्दीका भुपेन्द्र शर्मा र बाराका हिराबहादुर थापाले उद्यमी राष्ट्रिय पुरस्कार प्राप्त गरे । उनीहरूलाई पुरस्कारबापत जनही ७५ हजार रुपैयाँ नगद प्रदान गरिएको छ ।