काठमाडौं । सत्तासाझेदार दल राष्ट्रिय स्वतन्त्र पार्टी (रास्वपा)का सभापति रवि लामिछानेले आफूहरूले बढी बोल्दा अप्ठ्यारो परिस्थिति सिर्जना भएको बताएका छन् । नेकपा (एकीकृत समाजवादी)को १०औँ राष्ट्रिय महाधिवेशन उद्घाटनका क्रममा आइतबार उनले यस्तो बताएका हुन् ।

“पछि जन्मिएकोले ठूलो कुरा गर्नु हुँदैन । दिग्गज व्यक्तिहरूको अघि ‘छोटी मुख बढी बात’जस्तो हुन्छ । बढी बोल्ने भएकाले केही अप्ठ्यारो पर्दै आएकोले ध्यान दिनुपर्ने भएको छ,” उनले भने ।

उपप्रधान एवं गृहमन्त्री समेत रहेका लामिछानेले लोकतन्त्रमा खतरा भए जनताले जोगाइदिन्छन् भन्दै नेताहरूले चिन्ता लिनुपर्ने अवस्था नरहेको बताए । “लोकतन्त्रमा खतरा छ भने हामीबाट छ, जनताबाट छैन,” उनले भने ।

राष्ट्रिय सहमति गरेर अघि बढ्न कसले रोक्यो भन्ने प्रश्न गर्दै उनले थपे, “हामी सबैको भाषणमा जनताको चिन्ता छ, तर व्यवहारमा चिन्ता देखिँदैन । जनजीविकाको मुद्दामा एक हुनसक्छौँ ।”

उनले रास्वपा भर्खरै जन्मिएको राजनीतिक दल भए पनि संविधान र यसका व्यवस्था स्वीकार गरिसकेको बताए ।