काठमाडौं । प्रधानमन्त्री पुष्पकमल दाहाल ‘प्रचण्ड’ले राष्ट्रपति र उपराष्ट्रपति कार्यालयको खर्च घटाउने विषयमा एउटा समझदारी बनाएर जान सकिने बताएका छन् । 

मंगलबारको प्रतिनिधिसभा बैठकमा एमालेका सांसद रघुजी पन्तले चालु खर्च घटाउनलाई उपराष्ट्रपति र राष्ट्रियसभा अध्यक्ष एउटै व्यक्ति बनाउने कुरामा प्रधानमन्त्रीको विचार के छ भनी प्रश्न गरे । त्यस्तै, राष्ट्रपतिका सल्लाहकार घटाउन कानुन ल्याउने विषयमा प्रधानमन्त्रीको धारणा सोधेका थिए । 

जनता समाजवादी पार्टीकी सांसद रञ्जुकुमारी झाले पनि राष्ट्रियसभाको अध्यक्षको जिम्मेवारी उपराष्ट्रपतिलाई दिँदा के हुन्छ भनि प्रश्न गरेकी थिइन् । जवाफमा प्रधानमन्त्री प्रचण्डले भने “उपराष्ट्रपति, राष्ट्रपति कार्यालयको खर्चसम्बन्धी एउटा समझदारी बनाएर जान सकिन्छ । तर, अहिले नै त्यसलाई बदल्न सक्ने स्थिति छैन ।”