![लिखित सहमति नभएसम्म आन्दोलन जारी राख्ने कर्मचारीको चेतावनी, प्रदर्शन जारी](https://12khari.top/uploads/posts/staff-samsad-(24)-1718345889.jpg)
काठमाडौं । तलब, अतिरिक्त भत्तालगायत सेवा सुविधा वृद्धिको माग गर्दै संघीय संसद् सचिवालयका कर्मचारीले आन्दोलन जारी राखेका छन् । सरकार आफूहरूको मागप्रति गम्भीर नभएको भन्दै उनीहरूले आइतबार संसद् भवन नयाँबानेश्वरमा प्लेकार्डसहित शान्तिपूर्ण प्रदर्शन गरेका छन् । आफ्ना मागका बारेमा छलफल भए पनि लिखित सहमति नभएसम्म आन्दोलन जारी रहने उनीहरूले बताएका छन् ।
संघीय संसद् सचिवालय कर्मचारी प्रशासन नियमावली, २०६५ लाई अद्यावधिक गरी अनुसूची १२ लाई समयानुकूल परिमार्जन गर्नुपर्ने, अतिरिक्त समय काम लगाएबापतको अतिरिक्त प्रोत्साहन भत्ताको व्यवस्था गर्नुपर्नेलगायत माग राख्दै कर्मचारी आन्दोलनमा छन् ।
कर्मचारीहरूको निरन्तरको आन्दोलनपछि आइतबार प्रधानमन्त्री निवास बालुवाटारमा शीर्ष नेताहरूबीच छलफल भएको थियो । छलफलपछि कर्मचारीको मागबारे सहजीकरण गर्न कानुन, न्याय तथा संसदीय मामिला मन्त्री पदम गिरीको नेतृत्वमा तीन सदस्यीय समिति गठन गरिएको छ । समितिमा संघीय संसद् सचिवालयका महासचिव पद्मप्रसाद पाण्डेय र अर्थसचिव मधुकुमार मरासिनी रहेका छन् । समितिले एक दुई दिनभित्रै कर्मचारीसँग छलफल गरेर निष्कर्ष निकाल्ने कानुनमन्त्री गिरीले जानकारी दिए ।
बालुवाटारमा भएको छलफलमा प्रधानमन्त्रीसहित सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, पूर्वप्रधानमन्त्री एवं नेकपा एमालेका अध्यक्ष केपी शर्मा ओली, अर्थमन्त्री वर्षमान पुन र कानुनमन्त्री पदम गिरी सहभागी थिए । कर्मचारीको आन्दोलनका कारण संसदका गतिविधिहरू प्रभावित हुँदै आएको छ ।