काठमाडौं । बंगलादेशका बलर तान्जिम हसन साकिबलाई अन्तर्राष्ट्रिय क्रिकेट परिषद् (आईसीसी)ले कारबाही गरेको छ ।

अमेरिका र वेस्ट इन्डिजमा जारी आईसीसी ट्वान्टी–२० विश्वकपअन्तर्गत समूह चरणको आफ्नो अन्तिम खेलमा बंगलादेशका तान्जिमले नेपाली ब्याटरसँग मौखिक विवादमा उत्रिएका थिए । उनले नेपालका कप्तान रोहितकुमार पौडेलसँग विवाद गरेका थिए ।

आईसीसीले तान्जिमलाई कारबाही गर्दै उक्त खेलको १५ प्रतिशत म्याच फी काटेको छ ।

नेपालविरुद्ध घातक बलिङ गरेका तान्जिमले चार ओभर बलिङ गर्दा चार विकेट नै लिएर सात रनमात्र खर्चिएका थिए । उक्त खेलमा नेपालविरुद्ध २१ रनको जित निकाल्दै बंगलादेशले प्रतियोगिताको सुपर–८ मा स्थान पक्का गरेको थियो ।

आईसीसीका अनुसार तान्जिमले आईसीसीको दफा २.१२ उल्लंघन गरेका हुन् । आईसीसीको उक्त दफामा ‘कुनै खेलाडी, खेलाडीका अन्य सामग्रीहरू, अम्पायर, म्याच रेफ्री र खेलसँग सम्बन्धित व्यक्तिसँग अस्वाभाविक शारीरिक हाउभाउको प्रस्तुति’बारे उल्लेख छ ।