जनकपुर । मधेस प्रदेशका सभामुख रामचन्द्र मण्डलले अपरेटिभ संघीयतामा कोही सानो ठूलो नहुने बताएका छन् । सोमबार जनकपुरमा संसदीय पत्रकार मञ्च कोसी प्रदेशका पत्रकारहरूसँग अन्तर्क्रिया गर्दै भने, “अहिले समावेशीको दुनिया हो, कसैको विशेष अधिकार हुँदैन । सबैको समान अधिकार हुन्छ ।” तर, नेपाल एकात्मक ढंगले अघि बढाउन खोजिएको बताए । 

सभामुख मण्डलले आशाले मात्र समाजलाई सही ढंगबाट अघि बढाउन सकिने भन्दै संघीयताको छोटो अवधिमा धेरै अपेक्षा गर्नुभन्दा भए गरेका कामलाई अझ गति दिनुपर्ने बताए ।

उनले प्राथमिकीकरणमा ध्यान दिन समस्या रहेको भन्दै राज्यको संरचनामा समस्या नै समस्या हुन थालेको बताए । “संघीयताप्रति उदासीन विचार हुनुहुँदैन, मधेसले संघीय व्यवस्थालाई रुटेड बनाएको छ,” सभामुख मण्डलले भने ।

संघीयताका गतिविधि परिणाममुखी हुनुपर्ने भन्दै सुरुआत कठिन हुने र यो नयाँ व्यवस्था भएकोले यो कति जनपयोगी छ भन्ने परीक्षण हुन बाँकी रहेको बताए । उनले भने, “६ वर्षमै निराश हुने अवस्था छैन ।”