काठमाडौं । आईसीसी ट्वान्टी–२० विश्वकप क्रिकेट प्रतियोगिताअन्तर्गत आज भएको समूह ‘डी’ को अन्तिम खेलमा नेरदल्यान्ड्सलाई पराजित गर्दै श्रीलंका विजयी भएको छ । 

सेन्ट लुसियास्थित डारेन शामी राष्ट्रिय क्रिकेट मैदानमा सम्पन्न समूह चरणको आफ्नो अन्तिम खेलमा श्रीलंका ८३ रनले विजयी भएको हो । जितसँगै समूह ‘डी’ को श्रीलंकाले चार खेलमा तीन अंक जोडेको छ । पराजित नेदरल्यान्ड्सको भने समान खेलबाट दुई अंक नै छ । यस समूहबाट दक्षिण अफ्रिका र बंगलादेश विश्वकपको सुपर आठमा पुगिसकेका छन् ।  

श्रीलंकाले प्रस्तुत गरेको २०२ रनको विजयी लक्ष्य पछ्याएको नेदरल्यान्ड्स १६ दशमलव चार ओभरमा सबै विकेट गुमाउँदै ११८ रनमा समेटियो । उसका लागि माइकल लेभिट र कप्तान स्कट एड्वार्डसले समान ३१÷३१ रन जोडे । त्यस्तै म्याक्स ओडोउड र साइब्रान्ड एन्जलब्रेख्तले समान ११÷११ रन बनाए । आर्यन दत्तले १० रन जोडे । 

श्रीलंकाका लागि नुवान तुसाराले तीन विकेट लिए भने कप्तान वानिन्दु हसरंगा र मथिशा पथिरानाले समान दुई–दुई विकेट लिए । त्यस्तै, महेश तिक्क्षणा र डुसान सनाकाले समान एक–एक विकेट लिए ।

त्यसअघि टस हारेर पहिला ब्याटिङको निम्तो पाएको श्रीलंकाले निर्धारित २० ओभरमा ६ विकेट गुमाउँदै २०१ रनको योफफल बनाएको थियो । श्रीलंकाका लागि कुशल मेन्डिस र चरिथ अस्लंकाले समान ४६÷४६ रनको योगदान दिए ।

त्यसैगरी धनन्नजय डी सिल्भाले ३४ रन बनाए भने एन्जेलो म्याथ्युजले अविजित ३०, वानिन्दु हसरंगाले अविजित २० तथा कामिन्दु मेन्डिसले १७ रन बनाए । नेदरल्यान्ड्सका लागि लोगन भान विकले दुई विकेट लिए भने भिभियन किंगमा, आर्यन दत्त, पउल भान मिक्रेन र टिम प्रिन्गेलले समान एक–एक विकेट लिए । रासस