काठमाडौं । फिफा विश्वकप–२०२६ छनोटमा थाइल्यान्डकाे ११ प्रहार बचाएपछि सिंगापुरका गोलकिपर हसन सनीलाई चिनियाँ फुटबल समर्थकले उपहारस्वरुप पैसा पठाएका छन् ।

छनोटअन्तर्गत सिओलमा दक्षिण कोरियाविरुद्ध १–० ले पराजित भएपछि एसियाली क्वालिफायरको अन्तिम चरणमा पुग्ने चीनको सम्भावना कमजोर बनेको थियो । एसियाली दोस्रो चरण छनोटको समूह ‘सी’ को खेलमा चीन पराजित भएपछि अन्तिम चरण प्रवेशका लागि थाइल्यान्डलाई सिंगापुरविरुद्ध ३–० को जित आवश्यक थियो । यसैकारण चीनलाई अन्तिम चरण प्रवेशका लागि सिंगापुरले थाइल्यान्डलाई ३–० को भन्दा सानो जितमा रोक्नुपर्ने समीकरण थियो ।

सिंगापुरविरुद्ध थाइल्यान्डले ३–१ को जित निकाले पनि गोल आधारमा हेड टू हेडमा अघि रहँदै चीन एसियाली छनोटको अन्तिम चरणमा प्रवेश गरेको हो । थाइल्यान्डविरुद्ध ४० वर्षीय गोलकिपर हसनले उत्कृष्ट प्रदर्शन गर्दै चीनको फाइनल चरण सम्भव बनाएपछि चिनियाँ समर्थकहरूले उनलाई धन्यवाद स्वरुप पैसा उपहार पठाएका हुन् ।

हसनले सिंगापुरको राष्ट्रिय प्रशारक सीएनएलाई आफूले सञ्चालन गर्ने फुड स्टलको क्युआर कोडमा अहिले चिनियाँ समर्थकले आफूलाई पैसा पठाइरहेको बताए ।

“मैले यसमा खुसी मनाए । मलाई ‘ठिकै छ पैसा आइरहेको छ’ भन्ने महसुस भएको थियो,” उनले भने, “पैसाको यी सन्देशहरू देख्दा मेरो परिवार केही चकित बनेका थियाे ।”

हसनले हालसम्म समर्थकबाट कति रकम पाए भन्ने बारे खुलाएका छैनन् ।