विराटनगर । कोसी प्रदेशका मुख्यमन्त्री हिक्मत कार्कीले कानुन बनाउँदा निकै ध्यान दिनुपर्ने बताएका छन् ।

कोसी प्रदेशसभा सचिवालयले झापाको गौरादहमा बुधबार आयोजना गरेको प्रदेश तथा स्थानीय तहमा कानुन निर्माण प्रक्रिया र कार्यान्वनयको अवस्था विषयक कार्यक्रममा उनले कानुन बनाउँदा शब्दशब्दमा ध्यान दिनुपर्ने बताए ।

“कानुन निर्माण गर्दा देशको संविधान अध्ययन गर्न आवश्यक छ । कतिपय स्थानीय र प्रदेश सरकारले बनाएका कानुन संविधानसँग बाझिने गरी पनि आएका छन् । शब्दशब्दमा ध्यान दिन जरुरी छ,” उनले भने ।

कानुन पढेरमात्रै कानुन बनाउन नजानिने भन्दै उनले यो काम सबैभन्दा कठिन भएको सुनाए । उनले संघीयता आएको पछिल्ला सात वर्षको समय पर्याप्त रहेको उल्लेख गर्दै आवश्यक कानुन निर्माण गरी लागु गर्न आग्रह गरे ।

“सुशासनका लागि पनि कानुन अत्यावश्यक भएकाले त्यसतर्फ समेत ध्यान दिनुपर्छ,” उनले भने, “त्यसपछि राजस्व उठाउनसमेत सहज हुन्छ । त्यसले स्थानीय तह र प्रदेश सरकारलाई समेत विकास निर्माणका लागि बजेट विनियोजन गर्न सहज हुन्छ ।”

कार्यक्रममा कोसी प्रदेशका सभामुख अम्बरबहादुर विष्टले स्थानीय तहलाई कानुन निर्माणका लागि सहयोग गर्न तयार रहेको बताए ।