काठमाडौं । नियमित कप्तान क्रिस्टियानो रोनाल्डोबबिना मैदान उत्रिएको पोर्चुगल अन्तर्राष्ट्रिय मैत्रीपूर्ण फुटबलमा क्रोएसियासँग २–१ ले पराजित भएको छ ।

शनिबार पोर्चुगलमै भएको खेलमा पाहुना टिमलाई जित दिलाउन लुका मोड्रिच र एन्ते ब्युडिमिरले गोल गरे । घरेलु टिमका डियागो जोटाले गोल गरे पनि त्यो हार टार्न पर्याप्त बन्न सकेन ।

खेलको आठौँ मिनेटमा लुका मोड्रिचले पेनाल्टीमा गोल गर्दै क्रोएसियालाई अग्रतामा राखेका थिए । क्रोएसियाले पहिलो हाफमा १–० को अग्रता बनाए पनि ४८औँ मिनेटमा जोटाको गोलमा पोर्चुगल खेलमा फर्कियो । तर, ५६औँ मिनेटमा ब्युटिमिरले गोल गर्दै क्रोएसियालाई पुनः २–१ को अग्रतामा राखेका थिए । ब्युटिमिरको यही गोल निर्णायक बन्दा क्रोएसियाले पोर्चुगललाई घरेलु समर्थकमाझ नै निराश बनाएको हो ।

नियमित कप्तान रोनाल्डो युरो–२०२४ अघि बिदा मनाउन जाँदा पोर्चुगलको कप्तानी बर्नार्डो सिल्भाले सम्हालेका थिए । युरोपियन च्याम्पियनसिपअघि दोस्रो मैत्रीपूर्ण खेलमा पोर्चुगलले बुधबार आयरल्यान्डसँग खेल्ने तालिका छ ।

युरो–२०२४ जुन १६ देखि सुरु हुँदै छ । प्रतियोगितामा पोर्चुगल समूह ‘एफ’ मा छ । यो समूहमा पोर्चुगलसँगै टर्किया, जर्जिया र चेक गणतन्त्र छन् । यस्तै, क्रोएसिया भने प्रतियोगिताका समूह ‘बी’ मा छ । यो समूहमा क्रोएसियासँगै स्पेन, अल्बानिया र साविक विजेता इटाली छन् ।