काठमाडौं । भारतीय जनता पार्टी (भाजपा)का नेता नरेन्द्र मोदी तेस्रो कार्यकाल निम्ति प्रधानमन्त्री बन्ने तयारीमा छन् । उनलाई नेसनल डेमोक्र्याटिक एलायन्स (एनडीए) संसदीय दलको नेता बनाएर सरकारका लागि दाबी पेस गर्ने तयारी रहेको भारतीय सञ्चारमाध्यमले जनाएका छन् ।

त्यसका निम्ति एनडीएमा आबद्ध दलका नेताको बैठक शुक्रबार (भोलि) बस्दै छ । बैठकबाट मोदीलाई एनडीए संसदीय दलको नेता चयन गरिने र उनले सरकार बनाउन राष्ट्रपतिसमक्ष दाबी पेस गर्ने आजतकले जनाएको छ ।

भारतीय सञ्चारमाध्यमका अनुसार, मोदीले आउँदो शनिबार (जुन ८)मा तेस्रो कार्यकालका निम्ति प्रधानमन्त्री पदको शपथ लिने सम्भावना छ ।

उक्त शपथ समारोहबारे नेपाललाई औपचारिक जानकारी गराइएको छैन । नयाँ सरकार बनाउन राष्ट्रपतिसमक्ष दाबी, नियुक्तिको प्रक्रिया नै बाँकी छ । सोही कारण शपथको मिति पनि टुंगो लाग्न बाँकी छ ।

शपथको मिति तय हुन बाँकी रहेकाले औपचारिक रूपमा निमन्त्रणा पनि नगरिएको परराष्ट्र मन्त्रालय स्रोतको बुझाइ छ । शपथ समारोहमा नेपालबाट प्रधानमन्त्री पुष्पकमल दाहाल ‘प्रचण्ड’ सहभागी हुने सम्भावना छ ।

शपथमा सहभागी हुने तयारी गर्न अनौपचारिक रूपमा भने काठमाडौंस्थित भारतीय दूतावासबाट जानकारी आएको परराष्ट्र मन्त्रालय स्रोतले बतायो । “अनौपचारिक रूपमा तयारी गर्न भारतीय दूतावासबाट जानकारी गराइएको छ । औपचारिक रूपमा निमन्त्रणामा आइसकेको छैन,” स्रोतले बाह्रखरीसित भन्यो, “परराष्ट्रको भारत मामिला हेर्ने महाशाखाले त्यसबारे तयारी गरिरहेको छ ।”

परराष्ट्र मन्त्रालयका प्रवक्ता अमृत राईले पनि औपचारिक रूपमा निमन्त्रणा प्राप्त नभएको बताए । अनौपचारिक कुराकानी भने भइरहेको उनले जानकारी दिए ।

भारतबाट औपचारिक निमन्त्रणा प्राप्त भएपछि प्रधानमन्त्री प्रचण्ड शपथ समारोहमा सहभागी हुनेबारे टुंगो लाग्नेछ ।