विराटनगर । जनता समाजवादी पार्टी (जसपा) की कोसी प्रदेशसभा सदस्य निर्मला तावा लिम्बूले बलात्कार गर्नेलाई प्रदेशले फाँसीको सजाय दिने गरी कानुन बनाउनुपर्ने बताएकी छन् ।

कोसी प्रदेश सरकारले आगामी आर्थिक वर्ष २०८१/०८२ का लागि ल्याएको नीति तथा कार्यक्रममाथिको छलफलका क्रममा लिम्बूले बलात्कारका घटना धेरैजसो कोसी प्रदेशमा हुने गरेको बताइन् ।

“महिला तथा युवतीहरू बलात्कार घटनाबाट पीडित हुने क्रम अझ धेरै बढेको पाइन्छ, त्यसैले केन्द्र सरकारले नल्याए प्रदेश सरकारले फाँसी दिने कानुन ल्याउनुपर्छ,” उनले भनिन् ।

उनले केही समयअघि झापाको दमकमा प्रेम प्रस्ताव अस्वीकार गर्दा युवतीमाथि गोली प्रहार गर्नेसम्मको घटना भएको बताउँदै फाँसीको कानुन आवश्यक रहेको बताएकी हुन् ।

“बलात्कार गरेर मारिएका धेरै समाचारहरू सुनिन्छ । तर त्यसको सुनुवाइ खोइ ? सत्य कुरा तितो हुन्छ, तर यथार्थ पीडालाई कहिलेसम्म ढाकछोप गर्छौं,” उनले भनिन्, “नीतिगतरूपमा नै बलात्कारपछि हत्या गर्नेलाई मृत्युदण्डको प्रावधान कानुमा समावेश गरेर जानुपर्छ ।”