काठमाडौं । नेपाली कांग्रेसका सांसद तथा महामन्त्री गगन थापाले अहिलेको बजेटले नयाँ चरणको आर्थिक सुधारको मार्ग चित्रण नगरेको बताएका छन् । बुधबारको प्रतिनिधिसभा बैठकमा आउँदो आर्थिक वर्षको बजेटमाथिको छलफलका क्रममा थापाले बजेटमा प्रधानमन्त्रीले नै चासो नराखेको कुनै आशावादी हुने ठाउँ नरहेको बताएका हुन् ।

उनले नयाँ चरणको आर्थिक सुधार कसरी हुन्छ भनेर अर्थमन्त्रीलाई प्रश्न समेत गरेका छन् । बजेटमा उच्चस्तरीय आर्थिक सुधार आयोग बनाएर नयाँ चरणको आर्थिक सुधार नहुने बताए । जति आर्थिक सुधारका कुरा गरे पनि अहिलेकै संरचनामा केही हुन नसक्ने उनको भनाइ छ ।

“हामी त्यही एक खर्बको बजेट भएको स्ट्रक्चरबाट १६/१७ खर्बमा पुग्दै गर्दाको हाम्रो कर्मचारीको क्षमता यही छ । त्यही संरचना, त्यही शैली र त्यही सामर्थ्यले काम त्यही गरेर परिणाम फरक आउँदैन । परिणाम फरक ल्याउन जुन जोश जाँगर चाहिने हो,” थापाले भने, “जुन खालको एउटा सृजनसीलता चाहिने हो, त्यो अर्थमन्त्रीमा मात्र हैन प्रधानमन्त्रीमा पनि देखिएन । बजेट निर्माण गर्दैगर्दा प्रधानमन्त्रीले कुनै चासो राखेको पाइनँ । कुनै कुरामा संलग्न भएको पाइनँ । नेपालका प्रधानमन्त्रीले जबसम्म यतिधेरै उदासीनता राख्छन्, त्यो बेलासम्म बजेट काम लाग्ने डकुमेन्ट हुँदैन ।”

नयाँ भवन बनाएर मात्र नयाँ चरणको आर्थिक सुधार नहुने उनको भनाइ छ । स्थानीय तहले पाउने अनुदान घटाइएको भन्दै संघीयताको बारेमा अर्थमन्त्रीको धारणा सुन्न आफूले चाहेको पनि उनले बताए ।

त्यस्तै, एउटै पार्टीको अर्थमन्त्री र अर्थसचिव उही हुँदा करका विषयमा वर्षैपिच्छे फरक आउँदा आशंका गर्ने ठाउँ प्रशस्त रहेको पनि उनले बताए । “चिनियाँ गाडीको बारेमा विधेयकमा किन घुसाउनु भएको हो, जान्न चाहन्छु,” थापाले भने ।

बजेटको विश्वसनीयतामाथि प्रश्न उठेको उनको भनाइ छ । अहिले नेपालको अर्थतन्त्रलाई कडा रोग लागेको पनि बताए । यसको उपचार सबै मिलेर खोज्नुपर्ने थापाको भनाइ छ । “अर्थतन्त्रमा कडा रोग लागेको छ । यो रोग रातारात लागेको हैन । यसमा हामी सबै जिम्मेवार छौँ । म कसैलाई दोष दिन चाहन्नँ,” उनले भने, “वर्षाैंदेखि हामीले जुन संरचना बनायौँ, हाम्रो यो संरचनाले गर्दा आएको समस्या छ । यो संरचना नबदलिकन हुँदैन ।”

त्यस्तै नेपालीलाई बाहिर काम गर्न पठाएर कृषिमा खर्बाैँं रुपैयाँको आयात गर्ने अर्थतन्त्रको स्ट्रक्चरले विकास नहुने उनले बताए ।