![अर्थमन्त्रीलाई सांसद पाण्डेको प्रश्न– वामपन्थी बाहुल्य सरकारले ल्याएको यो कस्तो बजेट हो ?](https://12khari.top/uploads/posts/Rajendra-Pande-1-1717493477.jpg)
काठमाडौं । नेकपा (एकीकृत समाजवादी)का सांसद राजेन्द्र पाण्डेले अर्थमन्त्री वर्षमान पुनलाई वामपन्थी सांसदको बाहुल्यता भएको सरकारले ल्याएको बजेट कस्तो खालको हो भनि प्रश्न गरेका छन् ।
मंगलबार प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमान (बजेट)माथिको सामान्य छलफलमा बोल्दै उनले अर्थमन्त्रीको जवाफ माग गरेका हुन् ।
“९० प्रतिशतभन्दा बढी वामपन्थी सांसद भएको सरकारले ल्याएको बजेट । कम्युनिस्ट पार्टीका अध्यक्ष प्रधानमन्त्री, कम्युनिस्ट पार्टीकै नेता अर्थमन्त्री, कम्युनिस्ट पार्टीको धेरै संख्या भएको सरकारले ल्याएको यो बजेट वामपन्थी विचार र कार्यक्रम अनुसारको हो कि ? समाजवाद उन्मुख बजेट हो कि ? पुरानै परम्परालाई निर्वाह गर्न ल्याइएको बजेट हो ? यो म जान्न चाहन्छु, माननीय मन्त्रीज्यूसँग,” पाण्डेले भने ।
हँसिया र हथौडा लिएर किसानका लागि उभिएकाले के गर्यौँ ? रोजगार नपाएकालाई कस्ता कार्यक्रम ल्यायौँ भन्ने कुरामा मन्त्रीको ध्यान पुग्यो कि पुगेन भन्दै उनले प्रश्न गरे । उनले एमालेका अध्यक्ष केपी शर्मा ओलीले नै बजेटको आलोचना गरेको उल्लेख गरे । “यो बजेट निर्माणमा सत्तासिन पार्टीमा पनि छलफल भएन भने बजेट कसरी निर्माण भयो त ?” पाण्डेको प्रश्न छ ।
कृषिमा उत्पादन र उत्पादकत्व बढाउने भने पनि बजेट घटाइएको उनको भनाइ छ । कृषि दशक भने पनि कार्यक्रम नभएको टिप्पणी गरे । कर प्रणालीमा केही विरोधाभास देखिएको उनको भनाइ छ ।