![बजेटको कार्यक्रम र विनियोजनको अनुपात मिलेन : सांसद विष्ट](https://12khari.top/uploads/posts/gokarna-bista4-1717488471.jpg)
काठमाडौं । नेकपा (एमाले)का सांसद गोकर्ण विष्टले बजेटको कार्यक्रम र विनियोजनको अनुपात नमिलेको बताएका छन् । मंगलबार प्रतिनिधिसभा बैठकमा आउँदो आर्थिक वर्षको बजेटमाथिको छलफलका क्रमा उनले यस्तो टिप्पणी गरेका हुन् ।
“पाँच उद्देश्य, पाँच प्राथमिकता, पाँच रणनीति र पाँच रूपान्तरणकारी क्षेत्र भनेर छुट्ट्याएको छ । त्यसको अनुपातमा माननीय मन्त्रीज्यू कार्यक्रम र विनियोजन अलि भएन कि ?,” उनले भने, “कुरा राम्रै हो । तर, त्यसको अनुपातमा बजेट अलिक ठिक ढंगले आएन कि ?”
उनले कृषि लगानी दशक भनिए पनि त्यसमै विनियोजन घटाइएको बताए । सूचना प्रविधि दशक पनि भनिएको तर बजेटमा विनियोजन घटाइएको उनले उल्लेख गरे ।
“महिला लगानी वर्ष भनेको छ, तर महिला मन्त्रालयअन्तर्गत हुने कार्यक्रम र विनियोजन कटौती गरिएको छ,” उनले भने ।
उनले १६ लाख पर्यटक ‘हिँडेर आउन नसक्ने’ बताए । सार्वजनिक खर्च पुनरवलोकन गरिनुपर्नेमा उनले जोड दिए । उत्पादनमूलक क्षेत्रमा लगानी वृद्धि नगरी आर्थिक वृद्धिको अनुमान मेल नखाने उनको भनाइ छ ।
“६ प्रतिशत वृद्धिको अनुमान गरिएको छ । उत्पादनमूलक क्षेत्रमा लगानी वृद्धि नगरी कसरी आर्थिक वृद्धिको अनुमान मेल खान सक्छ ?,” उनले प्रश्न गरे ।