काठमाडौं । मनसुनजन्य विपद्का घटनाले पछिल्लो १० वर्षमा नेपालमा ३ हजार ५२ जनाको ज्यान लिएको छ । २०७१ देखि २०८० सालको अवधिमा भएका ८ हजार ४४१ वटा मनसुनजन्य विपद्का घटनामा उनीहरुको ज्यान गएको हो ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार, बाढी, पहिरो, भारीवर्षा र चट्याङका घटनाले उनीहरुको ज्यान लिएको हो । बितेको १० वर्षमा मनसुनजन्य विपद्का घटनामा परी ७९१ जना बेपत्ता भएका छन् । सोही अवधिमा मनसुनजन्य विपद्का घटनामा परी ४ हजार १७६ जना घाइते भएका थिए ।

प्राधिकरणको तथ्याङ्क अनुसार, पछिल्लो १० वर्षमा मनसुनजन्य विपद्का घटनाबाट ८५ हजार ६४६ परिवार प्रभावित भएका छन् । यस्ता घटनाले ४६ हजार ६९ घरमा आंशिक र १६ हजार ५४ घर पूर्ण क्षति गरेको छ । सोही अवधिमा १ हजार २४२ वटा गोठमा मनसुनजन्य विपद्का घटनाले क्षति गरेको छ ।

गएका १० वर्षमा मनसुनजन्य विपद्का घटनामा परी ६ हजार ६२४ चौपाय मरेका छन् । यस अवधिमा बाढीका १ हजार ६०२, पहिरोका २ हजार ८४०, भारी वर्षा १ हजार ५९७ र चट्याङका २ हजार ४०० घटना रेकर्ड भएका थिए ।

मनसुनजन्य विपद्का घटनामध्ये बितेको १० वर्षमा सबैभन्दा बढी मानवीय क्षति क्रमसः पहिरो, चट्याङ, बाढी र भारी वर्षाले गरेको देखिन्छ ।  सो अवधिमा पहिरोका घटनामा परी १ हजार ३१४, चट्याङ लागेर ८८५, बाढीका घटनामा परी ७४७ र भारी वर्षाका घटनामा परी १०६ जनाको मृत्यु भएको थियो ।
 
यस्तै, सबैभन्दा बढी बेपत्ता बाढीका घटनामा भएका छन् । उक्त अवधिमा बाढीका घटनामा परी ४७८, पहिरोमा परी ३१२ र भारीवषाका घटनामा परी १ जना बेपत्ता भएका छन् ।

बितेको एक दशकमा सबैभन्दा बढी घाइते चट्याङ लागेर भएका छन् । उक्त समयमा चट्याङ लागेर २ हजार ५८२, पहिरोका घटनामा परी १ हजार ११७, भारी वर्षाका कारण २८३ र बाढीमा परी १९३ जना घाइते भएको प्राधिकरणको तथ्याङ्कले देखाउँछ ।

सबैभन्दा बढी परिवार प्रभावित बाढीका घटनाबाट भएका छन् । प्राधिकरणको तथ्याङ्क अनुसार बाढीका घटनाबाट ६५ हजार २२, पहिरोबाट ११ हजार ८३१, भारी वर्षाबाट ५ हजार ७१३ र चट्याङबाट ३ हजार ७५ परिवार प्रभावित भएका छन् ।

गतवर्ष २०८० सालमा मात्र नेपालमा मनसुनजन्य विपद्का घटनाबाट ६३ जनाले ज्यान गुमाएका थिए । गत वर्ष रेकर्ड भएका ७६९ वटा मनसुनजन्य घटनामा परी ३० जना बेपत्ता र ६९ जना घाइते भएका थिए । गत वर्ष यस्ता घटनाबाट नेपालमा ५ हजार ९३७ परिवार प्रभावित भएका थिए ।