काठमाडौं । नेपाल कम्युनिस्ट पार्टी (एकीकृत समाजवादी)का सम्मानित नेता झलनाथ खनालले आउँदो १०औँ राष्ट्रिय महाधिवेशनबाट पार्टीको लक्ष्य, कार्यदिशा, नीति, सिद्धान्त र समाजवादी कार्यक्रम पारित गरिने बताएका छन् ।

महाधिवेशन मूल कमिटीअन्तर्गत अतिथि सत्कार कमिटीको शनिबार बसेको प्रथम बैठकमा उनले विचार, पद्धति, कार्यशैली र संस्कृतिका हिसाबले पनि पार्टी निर्माण गर्नुपर्नेमा जोड दिए । “नीति, सिद्धान्त र विचारका हिसाबले पार्टीलाई एकताबद्ध गराउनुपर्छ । नेकपा (एमाले)बाट  वैचारिक, सैद्धान्तिक, राजनीतिक र संगठनात्मक विद्रोह गरेको पुष्टि हुनुपर्छ,” उनले भने, “पार्टीभित्र यस विषयमा समझदारी बढेको छ । सिंगो समाजवादी क्रान्तिको कार्यक्रमले अन्य वामपन्थी दललाई पनि नयाँ ढाँचा दिनेछ । त्यसैले पार्टीले समाजवादी क्रान्तिको कार्यक्रम दिएर कार्यकर्तालाई स्पष्ट गराउनुपर्छ ।”

पूर्वप्रधानमन्त्री खनालले वामपन्थी एकताका निम्ति कोसी र सुदूरपश्चिम प्रदेश सरकारमा एमाले, नेकपा (माओवादी केन्द्र) र आफ्नो दल सम्मिलित हुनुपर्नेमा जोड दिए ।

उनले पार्टी अधिवेशनमा करिब एक हजार ३०० प्रतिनिधिको प्रतिनिधित्व रहने र आफूले गृहजिल्ला इलामका तर्फबाट अधिवेशनमा भाग लिने जानकारी दिए ।

बैठकमा पार्टी विदेश विभाग सचिव डा. शंकर खतिवडाले महाधिवेशनमा राष्ट्रिय, अन्तर्राष्ट्रिय अतिथिको सहभागिताबारे जानकारी गराएका थिए । यसैबीच, महाधिवेशनमा प्रस्तुत गरिने पार्टीका दस्ताबेजबारे आइतबार अपराह्न पत्रकार सम्मेलन गरी जानकारी गराइने बताइएको छ । रासस