काठमाडौं । मनसुनी प्रणाली भारतको अरुणाचल प्रदेशमा आइपुगेको छ । अरुणाचल प्रदेशको नागाल्यान्ड, मणिपुर, विजोरमलगायत ठाउँमा आइपुगेको जल तथा मौसम विज्ञान विभागले जनाएको छ । 

हिन्द महासागरबाट विकास भई बंगालको खाडी हुँदै दक्षिण–पूर्वी दिशाबाट मनसुनी वायु प्रणाली नेपाल प्रवेश गर्छ । “अहिले मनसुनी प्रणाली भारतको अरुणाचल प्रदेश आइपुगेको छ,” मौसमविद् गोविन्द झाले बाह्रखरीसँग भने, “यो नेपालतर्फ अगाडि बढ्नेक्रममा छ । कहिले नेपाल आइपुग्छ अहिले नै भन्न सकिँदैन ।” 

बाटोमा देखिने अवरोधका आधारमा यो प्रणाली नेपाल आउन कति समय लाग्छ निर्धारण हुने उनको भनाइ छ । कुनै अवरोध नभए चाँडै र अवरोध भए केही समय ढिलो पनि हुनसक्ने उनी बताउँछन् । 

• काठमाडौंमा अपराह्नपछि वर्षाको सम्भावना, हिजो भन्दा थोरै शितल हुने

“दक्षिण–पूर्वी क्षेत्रबाट मनसुनी प्रणाली नेपाल भित्रिएपछि पनि यो नेपालमा फैलिन कतिसमय लाग्छ भन्ने हो,” मौसमविद् झा भन्छन्, “कुनै वर्ष पश्चिमतर्फ सर्नेक्रममा बाटोमा अवरोध नभए चाँडै र अवरोध भए देशभर फैलिन पनि केही समय लाग्छ ।” 

मनसुनी प्रणाली नेपाल भित्रिने औसत मिति जुन १३ हो । तर यो औसत मिति मात्र हो । योभन्दा अगाडि वा पछाडि पनि मनसुन नेपाल भित्रिनसक्छ । 

सन् १९९६ मा मनसुनी प्रणाली मे ३१ मा नेपाल भित्रिएको थियो । त्यो वर्ष जल तथा मौसम विज्ञान विभागले तथ्यांक राख्ने गरेयताकै यो सबैभन्दा चाँडो मनसुन नेपाल भित्रिएको हो । 

सन् १९८२ मा नेपालमा जुन २७ मा नेपालमा मनसुन भित्रिएको थियो । विभागको तथ्यांकअनुसार यो सबैभन्दा ढिलो मनसुन भित्रिएको हो ।