काठमाडौं । कृषि तथा पशुपन्छी बिमाबापत रोकिएको ९७ करोड रुपैयाँ सरकारले तत्काल भुक्तानी गर्ने भएको छ । कृषि तथा पशुपन्छी विकासमन्त्री ज्वालाकुमारी साहको उपस्थितमा बिहीबार भएको बैठकमा नेपाल बिमक संघ र नेपाल बिमा प्राधिकरणका पदाधिकारीहरूबीच रोकिएको कृषि बिमाबापतको रकम निकासा गर्ने सहमति भएको हो ।

अनुदानबापतको रकम नपाएपछि निर्जीवन बिमा कम्पनीहरूले रोकेको कृषि तथा पशुपन्छी बिमा व्यवसाय सहमति भएसँगै पुनः सुरु गर्ने सहमति भएको हो ।  

बैठकमा सरकारले तत्कालै अनुदानबापत बक्यौता रहेको रकममध्ये ९७ करोड रुपैयाँ निकासी गर्ने भएपछि बिमालेख जारी गर्न बिमकहरू सहमत भएका हुन् ।

सरकारले दिने अनुदान रकम लामो समयदेखि रोकिँदा निर्जीवन बिमा कम्पनीहरूले गत वर्ष चैत १ गतेदेखि कृषि तथा पशुपन्छी बिमालेख जारी गर्न बन्द गरेका थिए । सरकारले कृषि तथा पशुपन्छीको बिमा गर्दा किसानलाई ८० प्रतिशत अनुदान दिँदै आएको थियो । बिमा गर्न लाग्ने प्रिमियमको २० प्रतिशत किसानले भुक्तानी गरेपछि बिमा कम्पनीहरूले बिमालेख जारी गर्दै आएका थिए ।