काठमाडौं । कीर्तिपुरस्थित त्रिवि क्रिकेट मैदानमा करिब ६० करोड रुपैयाँको संरचना बन्ने भएको छ ।बिहीबार युवा तथा खेलकुदमन्त्री विराजभक्त श्रेष्ठले मैदानको अवलोकन गर्दै मैदान परिसरमा ६० करोडको संरचना बन्ने जानकारी दिएका हुन् ।

“मन्त्रालयले एउटा प्रतिवदेन बनाएको थियो । जसमा कीर्तिपुर, मूलपानी र दशरथ रंगशालाको कुरा थियो । त्यसैअन्तर्गत रहेर यो रंगशालामा अब के गर्ने भन्ने कुरा हुँदा आज फिल्डमै आएर अवलोकन गरेका हौँ,” मन्त्री श्रेष्ठले भने, “हाम्रो मुख्य ध्यान भनेको दर्शकलाई खानेपानी र शौचालयको सुविधा उपलब्ध गराउनु हो । मैदानमा यी कुरा व्यवस्थित होस् भन्ने जनचाहना पनि थियो ।”

मन्त्री श्रेष्ठसँगै मन्त्रालयको टोली र राष्ट्रिय खेलकुद परिषद् (राखेप)का सदस्य–सचिव टंकलाल घिसिङले त्रिवि क्रिकेट मैदानको अवलोकन गरेका हुन् । मन्त्री श्रेष्ठले क्यानलाई भारतले २० करोड सहयोग दिने उल्लेख गर्दै त्यो रकमलाई कसरी खर्च गर्ने भन्ने विषयमा छलफल भइरहेको बताए ।

मन्त्री श्रेष्ठ भन्छन्, “भारतले दिने भनेको २० करोड र गत वर्ष फ्लड लाइटमा खर्च हुन नसकेको २० करोड रुपैयाँलाई एकमुष्ट रूपमा व्यवहारिक हिसाबले यहाँको संरचनालाई सुदृढीकरण गर्ने हाम्रो योजना हो । विदेशमा खेलाडीहरूको एकेडेमीका लागि त्यहाँका होटेल व्यवसायीले संरचना बनाइदिने र त्यसबाट आफ्नो व्यावसायिक प्रचार गर्ने चलन देखिएकाले हामीले पनि एकेडेमीका लागि हान (होटेल एसोसियसन अफ नेपाल)लाई अनुरोध गर्ने प्रक्रियामा छौँ ।”

आगामी आर्थिक वर्ष २०८१/८२ का लागि नेपाल सरकारले खेलकुदतर्फ कुल तीन अर्ब ५० करोडको बजेट छुट्याएको छ । जसअन्तर्गत संरचना निर्माणका लागि एक अर्ब ३० करोड विनियोजन भएको छ । मन्त्री श्रेष्ठले खेलुकदमा बजेट पर्याप्त नभए पनि पछिल्लो चार आर्थिक वर्षपछिको सबैभन्दा ठूलो रकम विनियोजना हुँदा उत्साहित रहेको बताए । उनले १०औँ राष्ट्रिय खेलकुदका लागि सरकारले बजेट विनियोजन गरिसकेकाले सबै स्थानीय तहलाई अहिलेदेखि नै खेलाडी उत्पादनमा लाग्न आग्रह समेत गरे ।

“खेलकुदमा यो वर्षको बजेट पनि पर्याप्त छैन । तर, अहिले हामी पछिल्लो चार वर्षयताकै ठूलो बजेट भएको अवस्थामा आइपुगेका छौँ,” उनले भने, “चाहना असीमित छ तर स्रोत र साधन सीमित छन् । तर, सधैँ राज्यसँग आस गरेर हुँदैन । खेलकुद भनेको व्यावसायिक पनि हुनुपर्छ । १०औँ राष्ट्रिय खेलकुदका लागि सरकारले बजेटमै ६० करोड छुट्याएको छ । म अहिले यहीबाट नेपालभरका सबै स्थानीय तहलाई अहिलेदेखि नै खेलाडी उत्पादन र तयार गरेर राख्न अनुरोध गर्दछु ।”

क्यानका सचिव पारस खड्काले मैदानको समर्थक बस्ने क्षेत्रमा क्षेत्र छुट्याएर महिला–पुरुष शौचालयको निर्माण गर्ने र भीआईपी क्षेत्रमा बसेर हेर्न मिल्ने संरचना बनाइने योजना सुनाए ।

“अहिलेलाई समर्थक बस्ने क्षेत्रमा जोन छुट्याएर व्यवस्थित महिला–पुरुष शौचालय बनाउने, भीआईपी क्षेत्रमा संरचना नै बनाएर गेम हेर्न बस्न मिल्ने ठाउँ बनाउने र पभेलियन क्षेत्रलाई अझ राम्रो बनाउने योजना छ,” सचिव खड्काले भने, “६० करोडले कति संरचना बन्छ भन्ने अनुमान लगाउन त सक्दिन । तर, मन्त्रालय र राखेपले देखाएको चासोप्रति क्यान उत्साहित छ । कहिलेकाही बजेट छुट्टाइन्छ तर, खर्च नहुने अवस्था देखा परेको छ । अहिले सबै बजेट उचित स्थानमा खर्च हुन्छ भन्ने आस लिएका छौँ ।”