![बजेटप्रतिको प्रतिक्रियाले ‘सरप्राइज’ भएँ : अर्थमन्त्री पुन](https://12khari.top/uploads/posts/barsaman-pun-1711092274.jpg)
काठमाडौं । अर्थमन्त्री वर्षमान पुनले आगामी आर्थिक वर्षको बजेटमा सबैले दिएको प्रतिक्रियाले आफू ‘सरप्राइज’ भएको बताएका छन् ।
नेपाल आर्थिक पत्रकार संघ (नाफिज)ले बिहीबार काठमाडौंमा आयोजना गरेको आगामी आर्थिक वर्ष २०८१/०८२ को बजेटमाथिको छलफल कार्यक्रममा मन्त्री पुनले प्रतिपक्षीले समेत बजेटको स्वागत गरेको बताए ।
अधिकांशबाट सकारात्मक प्रतिक्रिया आएको उनको भनाइ छ । “बजेटबारे अलिअलि आलोचना त आउनुपर्छ भन्ने लागेको थियो । केही ठाउँबाट आलोचना पनि आयो । त्यसमा पनि म खुसी नै छु,” उनले भने, “तर, अधिकांशले बजेट सन्तुलित नै आएको प्रतिक्रिया दिएका छन् । त्यसबाट आफैँ सरप्राइज भएको छु । म आफैँलाई पनि तथ्यमा आधारित भएर नै बजेट आएको जस्तो लाग्छ ।”
उनले सबै मन्त्रालय र निकायहरूको मेहनत र सरोकारवालाहरूको सुझावका आधारमा यस्तो बजेट ल्याउन सफल भएको बताए । तथ्यमा आधारित भएर बजेट बनाउँदा अधिकांश क्षेत्र र सरोकारवालाले बजेट स्वीकार गरेको उनको भनाइ छ । बजेटले उत्पादन तथा उद्योगलाई संरक्षण गर्नेतर्फ ध्यान दिइएको पनि उनको भनाइ छ ।
यस्तै, संसद्को अवरोध हटाएर बजेट प्रस्तुत गर्न सक्नु सकारात्मक पक्ष भएको मन्त्री पुनको दाबी छ । अर्थमन्त्री पुनले अर्थतन्त्र निर्माणका लागि केही न केही योगदान र त्याग गर्नुपर्ने बताए । यो विषय सबैले बुझ्नुपर्ने उनले भनाइ छ । खर्च कम गर्नेतर्फ सबै क्षेत्रले सोच्नुपर्ने उनले बताए । साझा क्षेत्र पहिचान गरी योगदान गर्नुपर्नेमा उनले जोड दिए । साझा सोचबाट नै आर्थिक सुधार गर्न सकिने उनले बताए ।
नीतिगत अस्थिरता कम गर्न अहिले कमभन्दा कम क्षेत्र चलाइएको उनले बताए । कृषि, पर्यटन, सूचना प्रविधि, ऊर्जालगायत प्राथमिकता प्राप्त क्षेत्रले आर्थिक वृद्धिमा मुख्य भूमिका खेल्ने उनको भनाइ छ । तसर्थ, बजेटमा उक्त क्षेत्रलाई बढी प्राथमिकता दिएको अर्थमन्त्री पुनले बताए ।
“कतिपय करका दर हेरफेरका कुरामा हामी सार्वजनिक बहस गरेर नै अगाडि बढ्न सक्छौँ,” उनले भने, “सही काम गर्दा निजी क्षेत्र सरकारसँग छलफल गर्न डराउनु पर्दैन । आगामी दिनमा अझै खुला छलफल हुनुपर्छ ।”
उनले स्पन्ज आइरनको करका दर हेरफेर गर्दा टिप्पणी आउँछ भन्नेमा पहिला नै जानकार भएको बताए । विभिन्न सरकारी अध्ययनको प्रतिवेदनको आधारमा नै यसमा करको दर परिवर्तन गरेको उनले बताए ।