काठमाडौं । अर्थमन्त्री वर्षमान पुनले आगामी वर्षको बजेटमा पाँच उद्देश्य, पाँच प्राथमिकता, पाँच आर्थिक सुधारका रणनीति र पाँच रूपान्तरण क्षेत्रका कार्यक्रम समेटिएको बताएका छन् । मंगलबार संघीय संसद्को संयुक्त बैठकमा आगामी आर्थिक वर्ष २०८१/८२ को बजेट प्रस्तुत गर्दै उनले यस्तो बताएका हुन् । 

अर्थमन्त्री पुनका अनुसार आगामी आर्थिक वर्षको बजेटको पाँच उद्देश्यमा उत्पादन, उत्पादकत्व र रोजगारी वृद्धि गर्नु, नीति क्षेत्रको मनोबल बढाउँदै लगानी वृद्धि गर्नु र आर्थिक क्रियाकलापमा तिव्रता ल्याउनु, मानव संशाधनको विकास गर्नु, स्रोत र साधनको सन्तुलित ढंगले परिचालन गरी आर्थिक असमानता र गरिबी न्यूनीकरण गर्नु र सार्वजनिक सेवालाई प्रभावकारी बनाउनु रहेका छन् । 

यस्तै, बजेटका पाँच प्राथमिकतामा आर्थिक क्षेत्र र निजी क्षेत्रको प्रवर्द्धन, ऊर्जा, कृषि, सूचना प्रविधि, पर्यटन, पूर्वाधार निर्माण, शिक्षा, स्वास्थ्यलगायत सामाजिक क्षेत्रको विकास, समावेशिता र सामाजिक सुरक्षा र सुशासन प्रवर्द्धन तथा सार्वजनिक सेवा प्रवाहमा सुधार रहेका छन् ।

आर्थिक सुधारका पाँच रणनीतिमा संरचनात्मक सुधार, व्यावसायिक वातावरण सुधार, सार्वजनिक वित्त प्रणाली सुधार, वित्तीय क्षेत्र सुधार र सार्वजनिक प्रशासनमा सुधारलाई समेटिएको अर्थमन्त्री पुनले बताए । 

पाँच रुपान्तरणका क्षेत्रका कार्यक्रममा कृषि क्षेत्रको रुपान्तरण, ऊर्जा क्षेत्रको विकास, सूचना प्रविधिको विकास, पर्यटन प्रवर्द्धन र उद्यमशीलतालाई समेटिएको उनले जनाए ।