काठमाडौं। नेपालमा आर्थिक वर्ष २०७९/०८० मा पछिल्लो पाँच वर्षयताकै धेरै मात्रामा विषादी आयात भएको छ । भर्खरै सार्वजनिक भएको महालेखा परीक्षकको ६१औँ प्रतिवेदनले कृषिजन्य उत्पादनमा प्रयोग हुने विषादी आर्थिक वर्ष ०७५/०७६ को तुलनामा ४६.३ प्रतिशतले बढेको उल्लेख छ ।

तरकारी, फलफूल तथा बालीमा प्रयोग हुने विषादी चालु आर्थिक वर्षमा पाँच हजार ९७५ नामका ११ लाख ८३ हजार ७४१ केजी विषादी आयात भएको छ । तिनको मूल्य एक अर्ब ६९ करोड ६३ लाख रुपैयाँ रहेको प्रतिवेदतनमा उल्लेख छ । आर्थिक वर्ष २०७५/०७६ मा ९५ करोड बराबरको आठ लाख नौ हजार केजी विषादी आयात भएको थियो ।

कृषि मन्त्रालयले किटनासक, ढुसिनासक, ब्याक्टेरियानासक विषादीको नियमन र प्रयोगमा कडाइ गर्नुपर्ने महालेखाको सुझाव छ ।