काठमाडौं । प्रमुख प्रतिपक्ष दल नेपाली कांग्रेसका महामन्त्री विश्वप्रकाश शर्माको अभिव्यक्तिले बालुवाटार बैठकमा प्रवेश पाएको छ । सोमबार बिहान प्रधानमन्त्री पुष्पकमल दाहाल ‘प्रचण्ड’ले बोलाएको बैठकमा कांग्रेसको अभिव्यक्तिलाई लिएर नेकपा (एमाले) आक्रोशित भएको हो । 

प्रधानमन्त्री प्रचण्डले सत्ता र प्रमुख प्रतिपक्षसँग छुट्टाछुट्टै संवाद गरेका थिए । उक्त संवादमा एमालेले कांग्रेस महामन्त्री शर्माको अभिव्यक्तिलाई लिएर प्रश्न उठाएको थियो । शर्माले आइतबार सडक प्रदर्शनको क्रममा चार विषय उठाएका थिए । जसमा एमाले अध्यक्ष केपी शर्मा ओलीको ग्रान्ड डिजाइनमा अहिलेको सबै विषय र घटना भइरहेको आरोप शर्माको थियो । 

शर्माले सहकारी अपचनलमा रवि देखाएर एमाले नेता जोगाउने प्रपन्चमा ओली लागेको, गिरीबन्धु टी स्टेट प्रकरणमा जोगिन, ०८४ मा रास्वपालाई उभिन नसक्ने गरी सिध्याउन ओली लागेको र सरकारको अंकगणित पुर्‍याउन पनि ओलीले खेल खेलेको आरोप लगाएका थिए । “उहाँहरूले यो कुरा उठाउनुभयो । यसले बन्न लागेको सहमति पनि भत्किने दिशामा जाने देखियो,” बैठकमा सहभागी एक नेताले भने । 

एमालेले यो विषयमा प्रतिकार गर्ने र कांग्रेससँग राजनीति लडाइँ लड्ने बताइसकेको अवस्था छ । आफ्नो अध्यक्षविरुद्ध निरन्तर ‘टार्गेट’ गरेर प्रतिशोध साधेकोमा एमाले आक्रोशित छ । 

बैठकबाट बाहिरिने क्रममा एमाले उपाध्यक्ष विष्णु पौडेलले कांग्रेसले पछिल्ला दिनमा आक्रोशित अभिव्यक्ति दिए । उनले एमाले र पार्टी अध्यक्ष ओलीविरुद्ध कांग्रेसले प्रायोजित पूर्वाग्रही तथ्यहीन गलत भ्रामक र आधारहीन लाञ्छाना लगाएको भन्दै आक्रोश पोखे । “यसप्रकारको आधारहीन यसबाट पछि हट्न अनुरोध गर्न चाहन्छु । यसबाट पछि हटेन भने यसविरुद्ध राजनीतिक प्रतिवादमा हामी उत्रन्छौँ,” उनले भने । 

कांग्रेस सहमतिमा पुग्नभन्दा पनि परिस्थिति विथोल्न लागि परेको आरोपमात्र लगाएन्न आफ्नो अध्यक्षमाथि लगाएको आरोपमा लिखित र सार्वजनिक रूपमा माफी माग्न कांग्रेसलाई अनुरोध गरे । कांग्रेसले यसो नगरे सबै राजनीतिक सम्बन्ध तोडिन सक्ने चेतावनी उनको थियो । “लिखित रूपमा क्षमा याचना गर्नुपर्छ सार्वजनिक माफी माग्नुपर्छ । अन्यथा कांग्रेससँग ठिक ढंगबाट सम्बन्ध अघि बढ्दैन । बुझोस् यस प्रकारको अराजनीतिक आरोपलाई सुनेर एमाले बस्दैन,” उनले भने । 

मिलन विन्दुमा पुग्न लागेको विषय एमालेको यो आक्रोशले विथोलिन्छ कि भन्ने भय सबैतिर बढेको छ । प्रधानमन्त्रीकै अघि यी विषय उठान हुनु र एमालेले प्रतिवादनमा उत्रने चेतावनी दिनुले सहमतिको विन्दु टाढिने खतरा बढेको नेताहरू बताउँछन् । “विषय पुनः जटिल बन्छ कि भन्ने देखिन गयो,” अर्का एक नेताले भने । 

नेकपा एमालेका प्रमुख सचेतक महेश बर्तौलाले सहकारीपीडितको ब्यानर बोकेर एमालेमाथि प्रहार गरेकोमा आपत्ति जनाए । कांग्रेसले सहमति नचाहेको भन्दै उनले विथोल्नका लागि आफ्नो अध्यक्षमाथि मिथ्या आरोप लगाएर भाड्ने प्रयासमा उद्धत भएको आरोप लगाए । 

नेपाली कांग्रेसका सहमहामन्त्री जीवन परियारले छुट्टाछुट्टै बैठक प्रधानमन्त्रीले गरेको जानकारी दिए । आफूहरूले कार्यदलमा लगेको लिखित विषय नै प्रधानमन्त्रीलाई जानकारी गराएको र कांग्रेसको बटमलाइन पुनः एकपटक स्मरण गराएको जानकारी दिए ।

जवाफमा प्रधानमन्त्रीले अहिलेको ‘डेट लक’ तोड्न सबै चाहेको र लचिलो बनिदिन कांग्रेससँग आग्रह गरेको परियारले बाह्रखरीसँग भने । “उहाँले डेट लक तोड्नुछ लचक बनिदिनुस् भन्नुभयो । हामीले हाम्रो बटमलाइनमा टसको मस नहुने कुरा राख्यौँ र पार्टीको कुरा राख्यौँ,” उनले भने । 

राष्ट्रिय स्वतन्त्र पार्टीका उपाध्यक्ष समेत रहेका सांसद स्वर्णिम वाग्लेले विषयहरू मिल्ने प्रक्रियामा गएको भन्दै प्रधानमन्त्रीको सदासहायता आज टुंगोस् भन्ने रहेको बताए । “प्रधानमन्त्रीको चाहना आज जसरी पनि टुंगो लगाउने छ । सहज कोर्षमा जाउ भन्ने छ । हामी त्यसका लागि प्रयत्नशील छौँ,” उनले भने ।