क्यालिफोर्निया । अमेरिकाको क्यालिफोर्नियामा एक घण्टासम्म आफ्नो जीवित बाबुलाई मारेको भन्ने गलत आरोप स्वीकार गर्न एक छोरालाई प्रहरीले दबाब दिएकामा नौ लाख डलर जरिवाना तिर्नुपरेको छ । ती व्यक्तिसँग १७ घण्टासम्म सोधपुछ गरिएको थियो ।

सन् २०१८ मा थोमस पेरेज जुनियरलाई लस एन्जेल्सको पूर्वमा पर्ने फोन्टोना सहरको प्रहरीले त्यसरी सोधपुछ गरेको थियो । न्यायाधीशले उक्त सोधपुछलाई असंवैधानिक, मनोवैज्ञानिक यातना भएको जनाउँदै पेरेजलाई आठ लाख ९८ हजार डलर क्षतिपूर्ति दिने गरी मुद्दा टुंग्याएको उनका वकिलले जनाएका छन् । उनीमाथिको त्यो असाधारण मुद्दाले आक्रोश उत्पन्न गराएको थियो ।

२०१८ अगस्ट ७ मा पेरेजका पिता थोमस चिठी लिन कुकुर लिएर गएका थिए । कुकुर केही समयमा फर्किएको थियो । तर, थोमस फर्किएनन् । भोलिपल्ट पेरेजले प्रहरीमा फोन गरेर बाबु नफर्किएको जनाएका थिए ।

अफिसर जोअन्ना पिनाले फोन उठाएकी थिइन् । उनीसहितका दुई प्रहरी अधिकृत आएर घरको खानतलासी गरेका थिए । त्यति बेला घरमा रगतको टाटो जस्तो केही देखिनुका साथै कुकुरले मानव शरीरको गन्ध फेला पारेको समेत दाबी गरिएको थियो । पेरेजलाई प्रहरीले ‘पितालाई लगेको स्थानमा हामीलाई लिएर जान सक्छौ ?’ भनेर प्रश्न सोधेको थियो ।

प्रहरीले उनीमाथि निद्राबाट वञ्चित, मानसिक बिरामी, साइकियाट्रिक मेडिकेसनबाट फिर्ता भएको र उनैले बाबुलाई मारेको जबर्जस्ती दोष थोपरेको थियो । सोधपुछका क्रममा पेरेजले असह्य भएर आफ्नो कपाल लुछेका थिए । उनले आफैँलाई हिर्काउनुका साथै सर्ट पनि च्यातेका थिए ।

बाबुको शरीर भएको ठाउँमा नलगे पेरेजले एक मिलियन डलरसम्म तिर्नुपर्ने चेतावनी समेत दिइएको थियो । प्रहरीको उक्त दबाबपछि पेरेजलाई बाबुको हत्या गरेको स्वीकार गर्न बाध्य पारिएको थियो ।

त्यसपछि पेरेजलाई साइकियाट्रिक अस्पतालमा पनि उनको इच्छाविपरीत लगिएको थियो । त्यही राति थोमसकी छोरीले फोन गरेर उनको पिता आफ्नो घर नर्थन क्यालिफोर्नियामा आउन लज एन्जेल्स इन्टरनेसनल विमानस्थलमा भएको जानकारी दिएकी थिइन् ।

त्यसपछि अदालतमा मुद्दा हालिएको र हुँदै नभएको अपराध स्वीकार्न लगाइएको भन्दै अन्याय भएको ठहर गरी पेरेज जुनियरलाई उक्त क्षतिपूर्ति रकम दिने सहमति भएको जनाइएको छ । द गार्जियनबाट ।