वासिङ्टन । अमेरिकी राष्ट्रपति डोनाल्ड ट्रम्पको विश्वव्यापी कर वृद्धिसँगै आयातमा आएको गिरावटका कारण अमेरिकी व्यापार घाटा अप्रिलमा आधाभन्दा बढीले घटेको बिहीबार सार्वजनिक सरकारी तथ्यांकले देखाएको छ ।

ट्रम्पले लगभग सबै व्यापारिक साझेदारमाथि १० प्रतिशत कर लगाउने घोषणा गरेकै महिना विश्वको सबैभन्दा ठूलो अर्थतन्त्र भनिने अमेरिकाले ६१.६ अर्ब डलरको व्यापार घाटा व्यहोरेको थियो । मार्चको तुलनामा यो घाटा ५५.५ प्रतिशतले घटेको अमेरिकी वाणिज्य विभागले जनाएको छ ।

ट्रम्पको कर कार्यान्वयनमा आउनुपहिले विदेशी वस्तुको आयातमा व्यापक लगानी गरेपछि मार्चमा समग्र अमेरिकी व्यापार घाटा १३८.३ अर्ब डलर पुगेको थियो । 

अमेरिकी सहयोगी र प्रतिस्पर्धीमाथि समान रूपमा १० प्रतिशत आधारभूत कर लगाएपछि अप्रिलमा आयात १६.३ प्रतिशतले घटेर ३५१ अर्ब डलरमा झरेको छ । 

आधारभूत १० प्रतिशत करबाहेक ट्रम्पले चीन, युरोपेली संघ र जापानसहितका दर्जनौँ अर्थतन्त्रमा उच्च कर दरको घोषणा पनि गरेका थिए । यद्यपि, ती दर व्यापार वार्ताका लागि ठाउँ दिने सर्तमा जुलाईको सुरुसम्म लागु नहुने सहमति ती मुलुकले गरेका छन् । 

विश्वका दुई ठूला अर्थतन्त्रले एकअर्काको उत्पादनमा दुवै पक्षको कर तीन अंकमा पुर्‍याएपछि चीनबाट आउने सामान ट्रम्पको सबैभन्दा ठूलो निशाना बनेको थियो ।

अमेरिका र चीनबीच स्थितिलाई कम गर्न अस्थायी सम्झौतामा पुग्नुअघि चीनबाट धेरै ढुवानी रोकिएको थियो । 

तत्कालका लागि सबैका आँखा ट्रम्प र चिनियाँ राष्ट्रपति सी जिनपिङबीचको फोन वार्तामा केन्द्रित छन् । उनीहरूबीच बिहीबार नै फोन वार्ता भएको छ । फोनवार्ताले विवादको दीर्घकालीन समाधान खोज्न मद्दत गर्न सक्ने आशा गरिएको छ । 

ट्रम्पले गत हप्ता बेइजिङले आफ्नो अस्थायी सम्झौताका सर्त उल्लंघन गरेको आरोप लगाएपछि दुई देशबीचको व्यापार सम्झौताको अवस्था अनिश्चित छ ।

गत अप्रिलमा अमेरिकी आयात १६.३ प्रतिशतले घटेर ३५१ अर्ब डलरमा झरेको थियो ।
 
विशेष गरी उपभोग्य वस्तुहरूको आयात ३३ अर्ब डलरले घटेको तथ्यांकले देखाएको छ।
 
अमेरिकी निर्यात तीन प्रतिशतले बढेर २८९.४ अर्ब डलर पुगेको छ, जसले औद्योगिक आपूर्तिजस्ता वस्तुनिर्यातलाई सहयोग गरेको छ । तर, अमेरिकी अटो तथा पार्टपुर्जाको निर्यात ३.३ अर्ब डलरले घटेको छ ।

मार्च र अप्रिलमा राष्ट्रपति ट्रम्पले स्टिल, आल्मुनियम र कारको आयातमा २५ प्रतिशत कर लगाएका थिए । उनले यस महिना दुवैमा कर दोब्बर पारिएको घोषणा गरेका छन् । 

सरकारी तथ्यांकअनुसार अप्रिलको समग्र अमेरिकी घाटा सन् २०२३ को सुरुदेखि अहिलेसम्मकै सबैभन्दा कम हो ।रासस/एएफपी