काठमाडौं । नेकपा (एमाले)का उपाध्यक्ष समेत रहेका सांसद विष्णु पौडेलले आउँदो वर्षको नीति तथा कार्यक्रम संसद्‌मा वेल घेरेर नाराबजी गर्नुपर्ने प्रकृतिको नरहेको टिप्पणी गरेका छन् । आइतबार प्रतिनिधिसभा बैठकमा प्रमुख प्रतिपक्ष दल नेपाली कांग्रेसका सांसदको नाराबाजीबीच जारी नीति तथा कार्यक्रममाथिको छलफलका क्रममा उनले यस्तो बताएका हुन् ।

“सरकारको नीति तथा कार्यक्रम यति राम्रो छ कि प्रतिपक्षमा रहेका मानीनय सदस्यहरूले वेल घेरेर नारा लगाउनुभन्दा ताली बजाएर छलफलमा सहभागी भएर समर्थन गर्नुपर्ने प्रकृतिको छ,” उनले भने ।

उनले नीति तथा कार्यक्रममाथि संशोधन राख्ने सांसदहरू चित्रबहादुर केसी र प्रेम सुवालले संसद्को गतिरोधप्रति असहमति जनाएको भन्दै धन्यवाद दिए ।

“संशोधन प्रस्ताव प्रस्तुत गरेर छलफलमा सहभागी भएर वास्तावमा संसद्भित्र जुन प्रकारको गतिरोध पैदा गर्ने कोसिस भइरहेको छ, त्यसप्रति असहमति जनाउनुहुने र नीति तथा कार्यक्रममाथिको छलफल निर्बाध अगाडि बढ्नुपर्छ भनेर योगदान गर्नुहुने माननीयहरू चित्रबहादुर केसी र प्रेम सुवालप्रति धन्यवाद व्यक्त गर्न चाहन्छु,” उनले भने ।