काठमाडौं । प्रधानमन्त्री पुष्पकमल दाहाल ‘प्रचण्ड’ले कान्तिपुर मिडिया ग्रुपका अध्यक्ष कैलाश सिरोहियालाई व्यक्तिगत प्रतिशोधबाट नभइ अदालती प्रक्रियाबाट नै पक्राउ गरेको बताएका छन् । 

बुधबार ‘हिमाल, जनता तथा जलवायु परिवर्तन’ विषयक अन्तर्राष्ट्रिय विज्ञ संवादलाई सम्बोधनपछि सञ्चारकर्मीसँगको प्रश्नमा प्रधानमन्त्री प्रचण्डले अदालतको आदेशपछि नै अदालती प्रक्रियाबाट सिरोहियालाई पक्राउ गरिएको बताए । 

सिरोहियासँग सरकारको कुनै शत्रुता नरहेको भन्दै उनले उपप्रधान एवं गृहमन्त्री व्यक्तिगत रूपमा लागेको भन्ने हल्ला मात्रै रहेको बताए । 

“अदालतले यो प्रक्रिया अघि बढाऊ भनेपछि अदालती प्रक्रिया अघि बढेको बुझेको छु मैले । यो बढ्ता होहल्ला गर्न जरुरी लाग्दैन । सरकारले रिसिइबी साँध्यो भन्नेकुरा गलत हो । उहाँसँग केको रिसिइबी । गृहमन्त्री व्यक्तिगत रूपमा आउनुभयो भन्नकुरा मान्छेले भन्नेकुरा मात्रै हो । यो अदालती प्रक्रियाबाट उहाँ निर्दोष हुनुहुन्छ, सजिलै छुट्नुहुन्छ, यो हल भइ नै हाल्छ,” प्रधानमन्त्रीले भने । 

अदालती प्रक्रियाबाट सिरोहिया निर्दोष हुने र सहजै छुट्ने उनको भनाइ छ ।