काठमाडौं । ललितपुर मेयर महिला च्याम्पियनसिपमा विभागीय टोली एपीएफ क्लबले लिग चरणका सबै खेलमा जित निकालेको छ ।

बिहीबार भएको समूह चरणको आफ्नो अन्तिम खेलमा एपीएफले सुदूरपश्चिम प्रदेशविरुद्ध तीन विकेटको जित निकालेको हो । 

कीर्तिपुरस्थित त्रिवि क्रिकेट मैदानमा भएको खेलमा सुदूरपश्चिम प्रदेशले प्रस्तुत गरेको ११२ रनको लक्ष्य एपीएफले १९.४ ओभरमा सात विकेट गुमाएर पूरा गर्‍यो ।

जितसँगै चार खेलबाट आठ अंक जोडेको एपीएफ अपराजित रहँदै फाइनलमा प्रवेश गरेको हो । तीन खेलबाट चार अंक जोडेको सुदूरपश्चिम तालिकाको दोस्रो स्थानमा छ । सुदूरपश्चिमले शुक्रबार वाग्मती प्रदेशविरुद्ध लिग चरणको अन्तिम खेल खेल्नेछ ।

आजै भएको दोस्रो खेलमा कोसी प्रदेशले ललितपुर मेयर्स–११ विरुद्ध ६ विकेटको जित निकालेको छ ।

प्रतियोगितामा सहभागी पाँच टिममध्ये शीर्ष दुई टिमले उपाधिका निम्ति प्रतिस्पर्धा गर्नेछन् ।