काठमाडौं । साताको अन्तिम कारोबार दिन बिहीबार धितोपत्र दोस्रो बजार मापक नेप्से परिसूचक झिनो अंकले बढेर बन्द भएको छ । यस दिन बजार ०.७९ अंकले बढेर २०१८.७६ विन्दुमा बन्द भएको हो ।

बिहीबार कारोबार रकम बढेको छ । बिहीबार चार अर्ब २३ करोड ३८ लाख रुपैयाँको सेयर कारोबार भएको छ । बुधबार तीन अर्ब ७० करोड रुपैयाँको सेयर कारोबार भएको थियो ।

यस दिन लघुवित्त कम्पनीमा सेयर कारोबारीहरू आकर्षित भएका छन् । कारोबारमा आएका १३ समूहगत परिसूचकमध्ये लघुवित्त र ‘अन्य’ समूहको परिसूचक वृद्धि भएको छ । लघुवित्त समूहको परिसूचक ३.८० प्रतिशतले वृद्धि भएको छ ।

बिहीबार हिमालयन लघुवित्त, जाल्पा सामुदायिक लघुवित्त सृजना लघुवित्त वित्तीय संस्थाको सेयर मूल्य १० प्रतिशतले वृद्धि भएको छ ।

त्यस्तै, ‘अन्य’ समूहको परिसूचक ०.२२ प्रतिशतले वृद्धि भएको छ । बिहीबार फाइनान्स समूहको परिसूचक सर्वाधिक घटेको छ । यो समूहको परिसूचक १.४५ प्रतिशतले घटेको छ ।

बिहीबार १०३ कम्पनीको सेयर मूल्य वृद्धि भएको छ भने १३९ कम्पनीको सेयर मूल्य घटेको छ । बाँकी तीन कम्पनीको सेयर मूल्य भने स्थिर छ ।