काठमाडौं । नेपाली कांग्रेसका सांसद प्रदीप पौडेलले सत्तामा बस्नेहरुले प्रश्न गर्न नमिल्ने बताएका छन् । बिहीबार काठमाडौंमा आयोजित प्रजातान्त्रिक विचार समाजको कार्यक्रममा बोल्दै उनले प्रमुख प्रतिपक्ष रहेको कांग्रेसको अहिलेको काम प्रश्न गर्ने भएको भन्दै सरकारमा बस्नेहरूले कांग्रेसमाथि प्रश्न गर्न नमिल्ने बताए । सत्तामा उत्तर दिनका लागि बस्नुपर्ने उनको भनाइ छ । 

कांग्रेसले भइरहेका अनियमितताविरुद्धमा आवाज उठाइरहेको भन्दै उनले अनियमितताबिरुद्ध आवाज उठाउँदा कांग्रेसमाथि प्रश्न गरिरहेको आरोप लगाए । 

“विपक्षमा बसेर कांग्रेसले प्रश्न गर्‍यो, सत्तामा बसेर सत्तारुढ दलहरूले कांग्रेसलाई प्रश्न गरिरहेका छन् । सत्तामा बस्ने त उत्तर दिनका लागि हो, कामबाट उत्तर दिने उद्देश्यका लागि सत्तामा बस्ने हो । तर, सत्तामा बसेर विपक्षीमा भएको कांग्रेसलाई प्रश्न गरिरहेका छन् । काँग्रेसको काम प्रश्न गर्ने हो, हामीले प्रश्न गर्‍यौँ । सत्ताको काम उत्तर दिने हो, उनीहरूको प्रश्न गर्ने होइन । उत्तर दिन सकेनन्, उनीहरुले जुन ढंगबाट अनियमितता गरेका छन्, जुन अनियमित ढंगबाट उत्तर दिन उनीहरुले सकेनन्, त्यसपछि बलजफ्ती गर्न खोजिरहेका छन्,” उनले भने । 

सांसद पौडेलले नेकपा एमालेका अध्यक्ष केपी शर्मा ओलीप्रति लक्षित गर्दै अदालतले गरेको निर्णयविरुद्धमा आफू अदालतभन्दा पनि माथि रहेझैँ आलोचना गरिरहेको आरोप लगाए । 

“अदालतले गरेको निर्णयमा धम्की दिन थालिएको छ । मेराविरुद्ध अदालतले निर्णय गर्न पाउँछ, म अदालतभन्दा धेरै माथि हुँ । मलाई अदालतले प्रश्न गर्ने, को हो त्यो न्यायाधीश, कुन हो त्यो अदालत ? त्यस्तो ढंगबाट धम्की आइरहेको छ । यो स्वभाविक हुन सक्दैन, लोकतन्त्रमाथिको जोखिम हो । कुनै व्यक्तिको लहडको कारणले नेपालको लोकतन्त्र समाप्त हुने बाटोतिर जान दिनुहुँदैन,” सांसद पौडेलले भने ।